Վարչապետը ծանոթացել է Սանահինի վերականգնողական աշխատանքներին 18 հունիսի 2013 - 17:34 AMT PanARMENIAN.Net - Լոռու մարզ կատարած աշխատանքային այցի ընթացքում վարչապետ Տիգրան Սարգսյանի առաջին կանգառը եղել է Սանահինի վանական համալիրում: ՀՀ մշակույթի նախարար Հասմիկ Պողոսյանը կառավարության ղեկավարին ծանոթացել է համալիրում կատարված և առաջիկայում իրականացվելիք վերականգնողական աշխատանքներին, հայտնում է կառավարության մամլո ծառայությունը: Զեկուցվել է, որ վարչապետ Սարգսյանի հանձնարարականով Սանահին վանական համալիրի Սբ. Աստվածածին (10-րդ դ.) և Սբ. Ամենափրկիչ (966 թ.) եկեղեցիների հարակից նախագավիթ-տապանատան, գավթի և Գրիգոր Մագիստրոսի ճեմարանի վերականգնման-ամրակայման աշխատանքները մեկնարկել են 2012 թ. երրորդ եռամսյակից: Աշխատանքների իրականացման համար 2012 թ. պետական բյուջեով հատկացվել էր 18 մլն դրամ: Արդեն իսկ մասնակի վերականգնվել է համալիրի Ս. Աստվածածին 10-րդ դարի եկեղեցին, հեռացվել է պատերի բուսածածկը, ամրակայվել և վերականգնվել են պատերի ու ծածկասալերի առանձին հատվածներ: Համալիրի վերականգնման ուղղությամբ 2013 թ. պետական բյուջեով հատկացվել է 22,5 մլն դրամ, որը նախատեսվում է ծախսել Ս. Աստվածածին եկեղեցու նախագավթի և Մագիստրոսի ճեմարանի մասնակի վերականգնման և ամրակայման աշխատանքների իրականացման համար: Տեղեկացվել է, որ ի կատարումն Տիգրան Սարգսյանի հանձնարարականի՝ 2010-2011 թթ. ընթացքում, մինչ հուշարձանի ամրակայման, վերականգնման նախագծանախահաշվային փաստաթղթերի կազմումը, իրականացվել են պահպանվածության առումով համալիրի առավել վթարված գլխավոր` արևմտյան թևի հուշարձանախմբի կառույցների համալիր գիտական ուսումնասիրություններ: Մասնավորապես, Վենետիկի վերականգնման կենտրոնի և Բեռլինի բարձր տեխնոլոգիաների համալսարանի մասնագետների կողմից ժամանակակից լազերային սարքերով եռաչափ ճշգրիտ չափագրումների միջոցով սահմանվել են հուշարձանների պատերի ձևախախտումների ու ճաքերի առաջացման պատճառները, բնույթն ու դրանց ներկա վիճակը: Ֆրանսիացի մասնագետներն ուսումնասիրել և ներկայացրել են առաջարկներ՝ կառույցների ծածկերի ջրամեկուսացման արդի տեխնոլոգիաների կիրառման վերաբերյալ, իսկ ՀՀ ԳԱԱ հնագիտության ու ազգագրության ինստիտուտի կողմից իրականացվել են տարածքի մասնակի պեղման ու հնագիտական հետախուզական աշխատանքներ: Բացի այդ, բացվել և ուսումնասիրվել են Սբ. Ամենափրկիչ (966 թ). համալիրի հիմքերն ու հիմնատակերը, տրվել տեղանքի ինժեներաերկրաբանական պայմանների վերաբերյալ եզրակացություն, ներկայացվել հուշարձանների հետագա պահպանությանը միտված արդյունավետ միջոցառումների կիրառման առաջարկություններ: Վարչապետի հաջորդ կանգառը եղել է Դսեղ գյուղում, որտեղ Տիգրան Սարգսյանը ծանոթացել է Հովհաննես Թումանյանի տուն-թանգարանի ջեռուցման, հիդրոմեկուսացման և վերանորոգման արդեն իսկ ավարտված աշխատանքներին: Դրանց իրականացման համար ներդրվել է 8 մլն 940 հազար դրամ, այդ թվում 894 հազարը՝ համայնքի բյուջեից: Տիգրան Սարգսյանը հավաստիացրել է, որ նմանատիպ կարևորագույն օբյեկտները գտնվում են կառավարության և անձամբ իր անմիջական հսկողության ներքո: Ուշագրավ Փեյնի հեղինակած 8 լիամետրաժ ֆիլմերն առաջադրվել են ընդհանուր թվով 24 Օսկարի Տիգրան Ավինյանն ու Գրեգորի Դուսեն այցելել են պատմական թաղամաս Snap-ը պլատինե երգի կարգավիճակ է ստացել նաև մի քանի այլ երկրներում Հայկական դուդուկի երաժշտությունը ՅՈՒՆԵՍԿՕ-ի ցանկում է ընդգրկվել դեռևս 2008 թ․ Ամենաընթերցվողը բաժնում | Միրզոյանն ու Կուլեբան կարևորվել են Կիևում անցկացված քաղաքական խորհրդակցությունները Անդրադարձ է կատարվել տարածաշրջանային թեմաներին ՀՀ և Սլովենիայի ԱԳ նախարարները քննարկել են երկկողմ օրակարգի և տարածաշրջանային հարցեր Միրզոյանը շնորհակալություն է հայտնել Լեռնային Ղարաբաղից տեղահանված երեխաներին աջակցության համար Միրզոյանը Բորելի հետ խոսել է տարածաշրջանային վերջին զարգացումներից Միրզոյանը շփումներ է ունեցել ֆորումին մասնակցող բարձրաստիճան պաշտոնյաների հետ Հուլիսի 1-ից Ջրային պարեկները կանցնեն ուժեղացված ծառայության Իրավախախտումների համար նախատեսված են տուգանքներ |