Անցած ձմեռն Ադրբեջանի համար ավելի մեղմ եղավ, քան նախորդը: Էներգետիկ ճգնաժամն այնքան լրջորեն չանդրադարձավ երկրի տնտեսության եւ սոցիալական կյանքի վրա, որքան նախորդ երկու տարիներին: Այնուհանդերձ, բնակարաններում հովհարային անջատումները մասսայական բնույթ էին կրում: Նույնիսկ Բաքվում ծայրամասերի բնակիչները օրերով էլեկտրական լույս չէին տեսնում: Տեղական թերթերը գրում էին հնարավոր էներգետիկ ճգնաժամի մասին: Ընդդիմության կանխատեսած սոցիալական պայթյունից հնարավոր եղավ խուսափել մեծ ջանքեր գործադրելով: Եվ այս ամենը մի երկրում, որը փորձում է աշխարհին համոզել, թե ածխաջրածնային վառելիքի հումքի անհատնելի պաշարներ ունի: