Ադրբեջանում կայացած ընտրությունների ընթացքն ապացուցեց, որ իշխանությանը կառչած վարչակարգի համար ժողովրդավարական արժեքները ոչ մի նշանակություն չունեն: Նման քանակի կեղծիքներ եւ իրավախախտումներ չէին ակնկալում նույնիսկ ամենահոռետես տրամադրված մեկնաբանները: Իրականությունն առավել վատթար եղավ, քան նրանք կանխատեսում էին: Նույնիսկ միջազգային կազմակերպությունների դիվանագիտորեն ձեւակերպված արձագանքները, որոնք փորձում էին Հայաստանում եւ Ադրբեջանում կայացած ընտրություններին տրված գնահատականներում պահպանել հավասարության սկզբունքը, թույլ են տալիս նկատել, որ Բաքվի իշխանավորները չափն անցել են: Իլհամ Ալիեւի լիգիտիմության մեջ կասկածելու հիմքերը բավականին շատ են: