Ադրբեջանի «Ղարաբաղի ազատագրման կազմակերպությունը» հայտարարել է, որ թույլ չի տա հայ զինծառայողների ներկայությունը ադրբեջանական հողի վրա:

Ամերիկայի հայկական համագումարը կոչ է արել կոնգրեսականներ Քրիստոֆեր Քոկսին եւ Լորետտա Սանչեսին Անկարա կատարելիք այցի ընթացքում բարձրացնել հայ-թուրքական սահմանի ապաշրջափակման մասին հարցը:

Վրաստանի նախագահի պաշտոնակատար Նինո Բուրջանաձեի հրամանագրով հիմնականում հայաբնակ Ախալքալաքի շրջանի վարչության նոր նախագահ է նշանակվել Արթուր Երեմյանը:

Թիֆլիսահայ թեկնածու Յուրի Մկրտումյանը չի ներկայացրել ԿԸՀ-ին ընտրություններում պաշտոնապես գրանցվելու համար անհրաժեշտ 50 հազար ստորագրությունները:

Հայաստանի եւ Ադրբեջանի նախագահների հանդիպումը Ժնեւում դարձավ Լեռնային Ղարաբաղի շուրջ բանակցությունների նոր փուլի սկիզբ, հայտարարել է ԵԱՀԿ Մինսկի խմբի համանախագահ, ՌԴ ԱԳՆ հատուկ հանձնարարություների դեսպան Յուրի Մերզլյակովը:

Մինսկի խմբի համանախագահների այցը տարածաշրջան թույլ տվեց նկատել, որ որոշակի հակասություններ կան այն երկրների մոտեցումներում, որոնց ԵԱՀԿ-ն վստահել է համակարգել ղարաբաղյան հակամարտության խաղաղ կարգավորման գործընթացը: Բաքվում գտնվելու ժամանակ, համանախագահներից մեկը մյուս համանախագահի հայտարարությանը լրիվ հակառակ արտահայտություն է թույլ տվել: Նման բան չէր եղել 1997թ.-ից ի վեր, երբ անիմաստ էր արդեն թաքցնել ռուսական եւ ամերիկյան դիվանագետների միջեւ առկա լուրջ հակասությունները: Եւ չնայած այսօր հակասություններն առնչվում են միայն տակտիկական հարցերին, ակնհայտ է, որ Մինսկի խմբի համանախագահների միջեւ միասնականության բացակայությունը կարող է ազդել բանակցությունների վերսկսման ընթացքի վրա: