Անհրաժեշտ միջոցների բացակայության պատճառով Վրաստանը հնարավորություն չունի նորոգել այն գազատարը, որով ռուսաստանյան գազ է փոխադրվում Հայաստան, հայտարարել է «Վրաստանի գազափոխադրման ընկերության» գլխավոր տնօրեն Յուրի Շիուկաշվիլին:

Բնապահպանության համաշխարհային հիմնադրամի ներկայացուցիչ Ֆրանկ Մերշելը նախազգուշացնում է, որ Բաքու-Թբիլիսի-Ջեյհան (ԲԹՋ) նավթատարի շինարարության նախագծի արագացված իրագործումը սպառնալիք է Կասպից ծովի տարածաշրջանի ֆլորայի եւ ֆաունայի համար:

Մարտի 9-ին Լեռնային Ղարաբաղի մայրաքաղաք Ստեփանակերտում կմեկնարկի շախմատի միջաազգային մրցաշար` նվիրված շախմատի աշխարհի չեմպիոն Տիգրան Պետրոսյանի 75-ամյակին:

ԱՄՆ-ի Սենատի միջազգային հարաբերությունների Կոմիտեում տեղի են ունեցել լսումներ կապված 2005թ.-ի բյուջետային հատկացումների մասին օրենքի նախագծի հետ: Այս փաստաթուղթն ամրագրում է Եվրասիական զարգացող պետություններին տրվող օգնության չափերը: Ինչպես եւ նախորդ երեք տարիներին, այս անգամ եւս վարչակարգը հանդես է եկել Հայաստանին տրվող օգնության չափերը կրճատելու նախաձեռնությամբ: Առանձնակի անհանգստություն է առաջացնում այն հանգամանքը, որ Սպիտակ տունն առաջարկում է ռազմական կարիքների համար չորս անգամ ավելի շատ գումար հատկացնել Ադրբեջանին, քան Հայաստանին: