Հայկական ընկերությունները կներկայացնեն տիեզերքին առնչվող իրենց լուծումները

PanARMENIAN.Net - Հայկական կողմից մրցույթի անցկացման հարցերով զբաղվում է X-Techընկերությունը: PanARMENIAN.Net ին տված հարցազրույցում ընկերության տնօրեն Արման Աթոյանը պատմել է մրցույթի և ներկայացվող պահանջների մասին:

International Space Apps Challenge-ը ենթադրում է միջազգային համագործակցություն տարբեր ոլորտներում, որն ուղղված կլինի տիեզերքի յուրացման խնդիրների լուծմանը: Մրցույթն անցկացվում է 48 ժամվա ընթացքում աշխարհի տարբեր քաղաքներում: Միջոցառումը ներառում է խնդիրների և գլոբալ պահանջների համատեղ լուծումներ, որոնք կիրառելի են ինչպես Երկրի վրա կյանքի համար, այնպես էլ տիեզերքի յուրացման ժամանակ: International Space Apps Challenge-ի հայկական տուրը լավ հնարավորություն է տեղի ընկերությունների համար մասնակցելու գլոբալ նախաձեռնությանը:

«NASA-ում մշակվել է միջազգային համագործակցության չափազանց հետաքրքիր ձևաչափ, որը գործում է արդեն հինգերորդ տարին: International Space Apps Challenge-ը փորձում է մոբիլիզացնել ցանկացած ռեսուրս` բարձր տեխնոլոգիաներ, դիզայն, կիրառական գիտություններ և այլն, ինչը թույլ է տալիս բարդ խնդիրների օպտիմալ լուծումներ գտնել: Մասնակիցները ստանում են տարբեր թեմատիկ առաջադրանքներ և փորձում են ներկայացնել իրենց լուծումները: Ընդ որում, լուծումները կարող են լինել տարբեր` օրինակ, սկաֆանդրի օպտիմալացում, մեծ հաշվարկներ, մեքենայացված ուսուցում, լուծումներ վիրտուալ իրականության կիրառմամբ և այլն: Արդյունքում, ստեղծվում է բաց ելքային կոդով պրոդուկտ, որը, հեռանկարում կարող է կիրառվել գլոբալ խնդիրների լուծման համար: Հիմք է ստեղծվում, որի վրա հենվելով կարելի է աշխատել հետագայում»,-պարզաբանել է զրուցակիցս:

Քանի որ ցանկացած լուծում, որը ներկայացվում է մրցույթի շրջանակում, բաց է, մյուս թիմերը կարող են օգտագործել այն ու զարգացնել: Գլխավորն, ըստ Աթոյանի, այն է, որ արգելվում է դրանց կոմերցիոն օգտագործումը: Հայկական ARLOOPA և X-Tech ընկերությունները նախկինում արդեն մասնակցել են մրցույթին` ներկայացնելով VR-լուծումներ Լուսնի կամ Մարսի վրա զբոսանքի տեսքով: Հետագայում նրանք հասան նրան, որ հերթական մրցույթն անցկացվի նաև Հայաստանում:

«Այս փուլում ինտենսիվ նախապատրաստական աշխատանք է տարվում: Հայաստանից մասնակցելու է 50 մարդ` 1-5 մասնակից ունեցող թիմերի կազմում, կամ անհատապես: Նրանք պետք է աշխատեն բաց ելքային տվյալների հետ, որոնք կտրամադրի NASA-ն` գլխավորն այն է, որ վերջնական պրոդուկտը հետաքրքիր լինի լայն զանգվածների համար` միաժամանակ գործնական լուծում պարունակելով կոնկրետ որևէ ոլորտում: Որպես անվանական օրինակ, որը հասու է նաև առաջին կուրսերի ուսանողներին` հավելվածի կամ կայքի ստեղծումն է, որն օրվա ցանկացած պահին ցույց կտա Լուսնի դիրքը Երկրի հանդեպ»,-ասել է Աթոյանը:

Գոյություն ունի 6 տիպի առաջադրանք` տեխնոլոգիաներ, օդագնացություն, տիեզերական կայան, Արեգակնային համակարգ, Երկիր մոլորակ և ուղևորություն դեպի Մարս: Յուրաքանչյուր կատեգորիան ունի ավելի կոնկրետ ենթաբաժիններ: Մրցույթին զուգահեռաբար մասնակցում են թիմեր աշխարհի 250 քաղաքից: Ապրիլի 23-ին թիմերը կներկայացնեն իրենց լուծումները: