100 օրվա վարչապետությունԿարեն Կարապետյանի կարևորագույն որոշումներն ու նախաձեռնությունները Դեկտեմբերի 21-ին լրանում է վաչապետ Կարեն Կարապետյանի պաշտոնավարման 100 օրը: Այս ժամկետը պայմանականորեն համարվում է պաշտոնյայի «փորձաշրջանի» ամփոփում: 21 դեկտեմբերի 2016 PanARMENIAN.Net - PAN-ը հավաքել է բոլոր կարևոր որոշումներն ու նախաձեռնությունները, որոնք Կարապետյանը հասցրել է ընդունել և իրագործել այս կարճ ժամանակահատվածում: Նոր կառավարության ձևավորումը Նշանակումից հետո Կարապետյանը նոր կառավարություն կազմավորեց՝ նոր կադրերով: Նա խոստացավ հիմնականում նախորդներից ավելի երիտասարդ նախարարների հետ համատեղ թարմություն բերել, իրականացնել արմատական փոփոխություններ: Արդյունքում կառավարության միջին տարիքը նվազեց 4.4-ով և դրա կազմում չներառվեցին հայկական քաղաքական կյանքի այնպիսի հնաբնակներ, ինչպիսիք են Հասմիկ Պողոսյանը, Սեյրան Օհանյանը, Գագիկ Բեգլարյանը, Գագիկ Խաչատրյանը: Հատուկ նշենք նաև Սուրիկ Խաչատրյանի «սեփական դիմումի համաձայն» Սյունիքի մարզպետի պաշտոնից հեռանալը: Իրականության ընդունումը Որպես առաջին քայլ՝ նորանշանակ վարչապետը կոչ արեց իրատեսորեն նայել ՀՀ տնտեսությանը. «Մեր տնտեսության վիճակը շատ ծանր է, չափազանց ծանր: Եթե ուզում ենք տնտեսության մեջ փոփոխություն անել, անհրաժեշտ են համակարգային փոփոխություններ: Կոնկրետ քայլեր են ձեռնարկվելու՝ սոցիալական լարվածության իջեցմանն ուղղված, նաև բիզնեսի զարգացման առումով»:
Ծախսերի օպտիմալացումը Վարչապետը պաշտոնին անցնելուց անմիջապես հետո սկսեց չեղարկել նախարարների չհիմնավորված գործուղումները՝ դրանց թիվը հասցնելով նվազագույնի: Բացի այդ, կրճատվեց կառավարական ծախսերի, անգամ՝ նախագահի աշխատակազմի բյուջեն: Բացի այդ, կրճատվեցին և փակվեցին Ծրագրերի իրականացման գրասենյակները (ԾԻԳ): Արդյունքում մինչև դեկտեմբերի 1-ը փակվեց 5 ԾԻԳ: Այժմ օտարերկրյա և միջազգային վարկային կազմակերպություններից ստացած վարկային միջոցներով ծրագրերը իրականացնում է 17 նմանատիպ կառույց, որից 11-ը ԾԻԳ է: Սակայն մինչև տարեվերջ նախատեսվում է փակել նման ևս 5-6 գրասենյակ: ⅓-ով կկրճատվեն նաև դրանց պահպանման ծախսերը: Էլէներգիան ու գազը Պաշտոնավարման 3-րդ օրը Կարապետյանը ՀԾԿՀ-ին, էներգետիկայի և բնական պաշարների, աշխատանքի և սոցիալական հարցերի նախարարներին առաջարկել է համատեղ քննարկել և առաջարկություններ ներկայացնել գազի և էլեկտրաէներգիայի սակագնային քաղաքականության վերանայման մասին: Արդյունքում, հոսանքի սակագինը կնվազի փետրվարի 1-ից, գազինը՝ հունվարի 1-ից: Մենաշնորհների դեմ (չ)պայքարը Կարեն Կարապետյանը հայտարարեց՝ չի պատրաստվում նպատակաուղղված պայքար տանել մենաշնորհները վերացնելու ուղղությամբ, սակայն ստեղծելու է հավասար պայմաններ, որպեսզի ոչ ոք չունենա ադմինիստրատիվ կամ կոռուպցիոն լծակներ կիրառելու հնարավորություն` գերիշխող դիրք ստանալու համար:
Այնուամենայնիվ, վարչապետը շեշտել է՝ ցանկացած մարդ կարող է ցանկացած ապրանք ներմուծել. «Երբ որ իմանաք, որ նման խոչընդոտ կա՝ անձամբ ինձ զանգահարում եք»: Թղթաբանության պարզեցումը Հոկտեմբերի 13-ին վարչապետը հայտարարեց՝ հաշվի առնելով ժամանակակից ՏՏ հնարավորությունները՝ ծառայությունները պետք է դարձնել ավելի հասանելի: «Հանձնարարում եմ ՀՀ աշխատանքի ու սոցիալական հարցերի նախարարին երեխայի ծննդյան միանվագ նպաստը ստանալու համար առցանց եղանակով դիմելու հնարավորություն ստեղծել»: Այստեղ մնում է միայն ավելացնել, որ համապատասխան առցանց ծառայությունն արեն իսկ գործում է: Վճարովի կայանատեղիները Վարչապետն ու նախագահ Սերժ Սարգսյանը միահամուռ (այստեղ մի քիչ բարդ է հասկանալը՝ ում նախաձեռնությունն էր սա) որոշեցին պետբյուջե ուղղել վճարովի կայանատեղիներից և տեսանկարահանող սարքերի միջոցով ստացվող շահույթը. «Սեքյուրիթի դրիմ», «Փարկինգ Սիթի Սերվիս» և «Լոկատոր» ՓԲԸ-ների գործառույթները, այդ թվում՝ ֆինանսական հոսքերի ամբողջական տնօրինումն ու կառավարումը, անցան պետական ու համայնքային կառույցներին: Կոռուպցիայի դեմ պայքարը Կոռուպցիայի դեմ պայքարն ավելի իրատեսական դարձնելու նպատակով վարչապետ Կարեն Կարապետյանի հանձնարարականով 2 օրինագիծ մշակվեց և ներկայացվեց: Դրանցից առաջինը ապօրինի հարստացման քրեականացման մասին օրինագծին էր, որը ենթադրում է, որ այն դեպքերում, երբ պաշտոնատար անձի ակտիվների աճն էականորեն գերազանցում է նրա օրինական եկամուտները, նա պետք է ենթարկվի քրեական պատասխանատվության:
Բացի այդ մշակվեց ևս մեկ օրինագիծ, որով սահմանափակվում են կանխիկ գործառնությունները: «Այսպես կոչված կեղծ փոխառությունները, կեղծ նվիրատվությունները հիմնականում կատարվում են կանխիկ եղանակով, և գործընթացը դարձնում են սկզբունքորեն անվերահսկելի: Շատ դեպքերում պարզ չէ՝ արդյոք հայտարարագիր ներկայացրած անձը ստացել է հայտարարագրում նշված փոխառությունը, թե՝ ոչ»,- որոշումը հիմնավորել է վարչապետը: Աշխատանքը դրսի հետ Վարչապետի նախաձեռնությամբ ակտիվացել է աշխատանքն արտերկրում ՀՀ դիվանագիտական ներկայացուցչությունների հետ: Մասնավորապես, որոշվել է, որ նման 15 ներկայացուցչությունում այսուհետ պետք է ՏՏ մասնագետներ լինեն, բացի այդ, գործարկվել է ներդրումային ծրագրերի հարթակը: Նպատակը մեկն է՝ դիվանագիտական ներկայացուցչությունների միջոցով արտասահմանյան ներդրումներ ներգրավել: Պրիմիտիվ գողությունը, շանտղությունն ու ռազմական պոլիգոնը Արդեն 100 օր ՀՀ Գործադիր իշխանությունը ղեկավարող Կարեն Կարապետյանը սիրում է իրերն իրենց անունով կոչել. «Պրիմիտիվ գողությունը վերացրեք» «Եթե մենք ստվերը դաշտ չբերենք, ինչ ուզում է անենք, երկիրը երկիր չենք դարձնի» «Սա փորձադաշտ չէ: Սա ռազմական պոլիգո՞ն է, ի՞նչ է: Իրականում այն տպավորությունն է, որ այս քաղաքում ով ինչ ցանկանա՝ կարող է անել» «Ուղղակի դա «շանտղություն է», որ մենք թույլ ենք տալիս կամ չենք հետևում՝ մեր երեխան, մեր հարսը, մեր աղջիկն ինչ են ուտում»
Ոչ 7 ամսով Երբ Կարապետյանը նշանակվեց վարչապետի պաշտոնում, բոլորին մեկ հարց էր հուզում՝ որքան ժամանակով՝ 7 ամսո՞վ, թե՞… Առայժմ հայտնի է միայն, որ հաջորդ խորհրդարանական ընտրություններում ՀՀԿ-ի հաղթանակի դեպքում նա կշարունակի պաշտոնավարել, իսկ թե ինչ կլինի 2018-ի փետրվարից հետո, դեռ ոչ ոք չգիտի, կամ՝ գրեթե ոչ ոք: Քրիստինե Քյուրքլյան / PanARMENIAN.Net Ամենաընթերցվողը բաժնում ՀՀԿ-ն «աղքատացել է», ՔՊ-ն՝ «հարստացել» Հայաստանի բազմաթիվ կառույցներ մնացել են առանց ղեկավարի Ով ինչպիսի աղմուկով հեռացավ և ինչու Հայաստանը նոյեմբերի 10-ից հետո՝ թվերով Բաժնի այլ նյութերը «Խաղի» մեջ վերադառնալու ցանկությամբ ՌԴ-ն փորձում է չմարգինալացվել ՀՀ-Ադրբեջան բանակցային գործընթացում Դրագոմանների ժամանակը Դեպի արդիականացված արտաքին քաղաքականություն Բարձր պաշտոնից՝ մեղավորի աթոռին 2018-ի «մեղադրյալները» | Խուզարկվում են ԱԺԲ գրասենյակներն ու անդամների տները մոտ 40 հասցեում Խուզարկել են Ժիրայր Սեֆիլյանի, Արա Պապյանի և այլոց տները Ստեփանյան․ Արցախից բռնի տեղահանվածներից մոտ 11,000–ն արտագաղթել է ՀՀ-ից Ըստ նրա, կան նաև այլ տվյալներ՝ 15,000 արտագաղթածի մասին ԵԱՏՄ–ում ռոումինգի գնագոյացման կանոնները կընդունվեն մինչև 2024-ի վերջ Դեռևս մնում են բաց հարցեր Լոնդոնի հետ քննարկվել են Երևանի նոր գլխավոր հատակագծի մշակման հարցեր Քննարկումն ընթացել է Լոնդոնի քաղաքային պլանավորման OUTCOMIST ընկերության հիմնադիր-տնօրեն Քրիս Չոայի հետ |