Հայ ըմբիշները՝ Եվրոպայի առաջնությունից իրենց տպավորությունների մասին

PanARMENIAN.Net - Եվրոպայի չեմպիոն, 21-ամյա Արթուր Ալեքսանյանը խոստովանել է, որ շատ ուրախ է առաջին ոսկե մեդալի համար: «Ես շատ ուրախ և հպարտ էի, որ կարողացա իմ երկրի համար ոսկե մեդալ նվաճել: Առաջնությունն ինձ համար բավականին հաջող էր, ամենաբարդը 1/8 եզրափակիչն էր, որտեղ պայքարում էի ուկրաինացի Սերգի Ռուտենկոյի դեմ, սակայն երկու շրջաններում էլ կարողացա հաղթել»,-ասել է Ալեքսանյանը:

«Ինձ ուրախացնում է այն, որ Եվրոպայի առաջնությանը երիտասարդ ըմբիշ Արթուր Ալեքսանյանը կարողացավ նվաճել ոսկե մեդալ: Մինչև մրցաշարը մենք ակնկալում էինք, որ նա հաջող հանդես կգա, քանի որ մարզումների ընթացքում զգացվում էր նրա պատրաստվածությունը: Ես` որպես գլխավոր մարզիչ, շատ ուրախ եմ և գոհ, որ մենք ունենք նման տաղանդավոր մարզիկ»,- ընդգծել է Հայաստանի հավաքականի մարզիչ Լևոն Ջուլֆալակյանը:

Գլխավոր մարզիչն ասել է, որ գոհ է իր սաների ելույթներից Բելգրադում անցած Եվրոպայի առաջնությանը: «Մեր 7 ըմբիշներից 3-ը մեդալներ նվաճեցին՝ Եվրոպայի չեմպիոն դարձավ Արթուր Ալեքսանյանը, իսկ բրոնզե մեդալներ նվաճեցին Արսեն Ջուլֆալակյանն ու Յուրի Պատրիկեևը»,-ասել է մարզիչը:

Ըստ նրա, հավաքականի բոլոր ըմբիշները պայքարեցին մինչև վերջ ու լավ մենամարտեր անցկացրեցին. «Կարող եմ ասել, որ ոմանց փորձը չհերիքեց, սակայն, մեզ այնուամենայնիվ հաջողվեց ընդհանուր թիմային հաշվարկում 5-րդ տեղը զբաղեցնել»:

Ջուլֆալակյանի խոսքով, նրա որդին՝ Արսեն Ջուլֆալակյանը, գտնվել է լավ մարզավիճակում և գեղեցիկ մենամարտեր է ներկայացրել:

Արսեն Ջուլֆալակյանն իր հերթին նշել է, որ առաջնությունը շատ անսպասելի էր, որովհետև մրցավարությունը սարսափելի էր: «Օլիմպիադային մնում է 3 ամիս, և նման մրցավարությունն անթույլատրելի է: Եվրոպայի առաջնությունում մեր գլխավոր նպատակն էր նախապատրաստվել վարկանիշային մրցաշարերին»,- ասել է Ջուլֆալակյանը:

Մեկնաբանելով իր մասնակցությունը, Ջուլֆալակյանն ասել է, որ լավ մարզավիճակում է եղել, բայց որոշել է խնայել ուժերը, քանի որ պատրաստվում է օլիմպիական խաղերին. «Մի քիչ թույլ ստացվեց 3-րդ տեղի համար մենամարտը, բայց գլխավորը՝ ինձ հաջողվեց հաղթել»:

Լևոն Ջուլֆալակյանը գոհ է Պատրիկեևի ելույթից` անկախ նվաճված մեդալից: «Նա զիջել է թուրք ըմբիշ Ռիզա Կայալպին, ով երիտասարդ և առաջադեմ մարզիկ է»,-ընդգծել է մարզիչը:

Ազատ ոճի ըմշամարտ. Ազատ ոճի ըմբշամարտի Հայաստանի հավաքականից բրոնզե մեդալ է նվաճել Դավիթ Սաֆարյանը (66 ք/կ): Հավաքականի գլխավոր մարզիչ Արայիկ Բաղդադյանն ասել է, որ դժգոհ է իր սաների ելույթից: «Նվաճված մեդալի շնորհիվ ելույթը նորմալ եմ գնահատում, բայց ես Եվրոպայի առաջնությունից ավելին էի ակնկալում, քանի որ գիտեի՝ իմ սաները պատրաստ են ԵԱ-ին»,- ասել է Բաղդադյանը:

Առաջնությունից անմիջապես հետո ազատ ոճի ըմբիշները շարունակում են պատրաստվել վարկանիշային մրցաշարերի: Հիմա նրանց բարդ աշխատանք է սպասվում, ըմբիշները պետք է ուղղեն սխալները, որոնք թույլ են տվել Եվրոպայի առաջնության ժամանակ:

Առաջնության մրցավարությունը և Ռոման Ամոյանի հետ կապված միջադեպը. Առաջնության մասնակիցների մեծամասնությունը դժգոհ էին մրցավարությունից: Մրցավարներն օբյեկտիվ չէին և սխալներ են թույլ տվել:

Տհաճ միջադեպ է տեղի ունեցել հայ ըմբիշ, Եվրոպայի երկակի չեմպիոն, աշխարհի արծաթե մեդալակիր և օլիմպիական խաղերի բրոզնե մեդալակիր Ռոման Ամոյանի հետ (55 ք/կ):

1/8 եզրափակչում Ամոյանը հանդիպել է ադրբեջանցի Էլչին Ալիևի հետ: Մենամարտն ընթացել է շատ տհաճ մթնոլորտում: Հայաստանի հավաքականի գլխավոր մարզչի խոսքով, ադրբեջանցին մրցել է փողոցային կռվի կանոններով: Բայց մրցավարները ոչ միայն չեն նկատել Ալիևի նման պահվածքը, այլ նաև նրան հաղթող են հայտարարել: Մենամարտից հետո Ըմբշամարտի միջազգային ֆեդերացիան որակազրկել է հայ ըմբիշին, ով հրաժարվել է հանդիպման վերջում սեղմել մրցակից ձեռքը, և բոլոր մրցավարներին: «Բայց արդեն ոչինչ փոխել չի կարելի, և միջազգային ֆեդերացիան պետք է մենամարտի ժամանակ ինչ-որ բան աներ, քանի որ նման մրցավարությունն անթույլատրելի է»,- ասել է Ջուլֆալակյանը:

Ամոյանի հետագա ճակատագիրը որոշվելու է FILA նիստում, որտեղ քննարկվելու են նաև մրցավարների սխալները: Ջուլֆալակյանը հույս ունի, որ որակազրկումը չի ազդի Ամոյանի հետագա ելույթների վրա, քանի որ արդեն ապրիլի վերջին նա պետք է հանդես գա Բուլղարիայում կայանալիք վարկանիշային մրցաշարում: «Ես հուսով եմ, որ FILA-ն ճիշտ որոշում կկայացնի:

Բայց եթե այդ որոշումն ազդի մեր ըմբիշի մարզական կարիերայի վրա, մեր ֆեդերացիան, օլիմպիական կոմիտեն և սպորտի նախարարությունը համապատասպան միջոցներ կձեռնարկեն»,- հավելել է մարզիչը:

Եվրոպայի և աշխարհի առաջնություններում հայ և ադրբեջանցի ըմբիշների միջև բոլոր հանդիպումները մեծ հետաքրքրություն են առաջացրել, և երկու երկրների ներկայացուցիչներն իրենց ակտիվում ունեն թե հաղթանակներ, թե պարտություններ: «Մենամարտի ժամանակ մենք բոլոր ըմբիշներին, այդ թվում ադրբեջանցիներին վերաբերվում ենք որպես մրցակիցների: Ողջ աշխարհը գիտի, թե որքան ուժեղ է Ամոյանը, և շատերը, այդ թվում ադրբեջանցի ըմբիշները, վախենում են հանդիպել նրա հետ»,- նշել է Ջուլֆալակյանը;