«Զվարթնոցի» ժամանման նոր սրահը համապատասխանում է բոլոր միջազգային չափանիշներին

  5 հոկտեմբերի 2011 - 18:04 AMT

PanARMENIAN.Net - Հոկտեմբերի 5-ին կայացավ Երևանի «Զվարթնոց» օդանավակայանի ուղևորների ժամանման սրահը պաշտոնապես շահագործման հանձնելու արարողությունը: «Այսուհետ բոլոր ժամանած ուղևորներին դիմավորելու են ընդունելության նոր սրահում»,- հայտնել է «Արմենիա - Միջազգային օդանավակայաններ» ՓԲԸ գլխավոր մենեջերի տեղակալ Անդրանիկ Շխյանը: Նրա խոսքով` 21-րդ դարի օդանավակայանը պետք է համապատասխանի չափանիշներին, որոնցով ապահովվում է օդանավակայանին առընթեր գործող բոլոր ծառայությունների արդյունավետությունն ու հասանելիությունը: «Նոր տերմինալը համապատասխանում է այդ չափանիշներին»,- ընդգծել է նա` հավելելով, որ գործող Wi-Fi կապը կթեթևացնի ժամանող ուղևորների սպասման գործընթացը: «Բացի դրանից, նոր տերմինալին կից կներկայացվեն բրենդային ընկերություններ, որոնց թվում` երկու հայկական բանկ, ինչպես նաև տաքսի ծառայություններ»,- հաղորդել է նա:

«Արմավիա» ազգային ավիափոխադրող ավիաընկերության սեփականատեր Միխայիլ Բագդասարովն իր հերթին ընդգծել է, որ նոր տերմինալը հարմարավետ և ժամանակակից է: «Շնորհակալություն եմ հայտնում օդանավակայանի ղեկավարությանը նրանց կատարած աշխատանքի համար: Մենք իզուր չէինք այսքան երկար սպասել»,- ասել է նա` հավելելով, որ նման մակարդակի օդանավակայանը թույլ կտա ավելի շատ զբոսաշրջիկներ ներգրավել Հայաստան:

Իսկ ինչ վերաբերում է չվերթների քանակի ավելացմանը, ապա, «Արմավիայի» տնօրենի խոսքով, ամեն ինչ կախված է բնակչության վճարողունակությունից և երկրի տնտեսության զարգացումից: Այս կապակցությամբ նա հավելել է, որ համաշխարհային ավիաճյուղը հետճգնաժամային շրջանում կորուստներ է կրում: Նշենք, որ մեկնման սրահը կբացվի մեկ ամսից:

Հայաստանի անկախության 20-ամյակին նվիրված տոնակատարությունների և լայնամասշտաբ միջոցառումների շրջանակում սեպտեմբերի 16-ին Հայաստանի նախագահ Սերժ Սարգսյանի մասնակցությամբ կայացել է «Զվարթնոցի» նոր տերմինալը շահագործման հանձնելու պաշտոնական արարողությունը: Ողջույնի խոսքով հանդես է եկել արգենտինահայ գործարար Էդուարդո Էռնեկյանը, որն իր պատրաստակամությունն է հայտնել աջակցելու Հայաստանին իր զարգացման ճանապարհին: Նոր տերմինալն օծվել է Ամենայն հայոց կաթողիկոս Գարեգին Բ-ի մասնակցությամբ:

Նոր տերմինալն ամբողջությամբ կփոխի ուղևորների պատկերացումներն օդանավակայանի ծառայությունների մատուցման մասին` դրանք ներկայացնելով որակապես նոր տեսանկյունից: Կարելի է ասել, որ վերջին 20 տարիների ընթացքում Հայաստանը նման մասշտաբի և նշանակության օբյեկտ շահագործման չի հանձնել: Ավելին, նոր տերմինալն իր սարքավորումներով առաջատարը կդառնա տարածաշրջանում:

Տերմինալը 34 հազար քառ. մ տարածք է զբաղեցնում: Համալիրի շենքում կտեղակայվեն բարձր դասի սրահներ ուղևորների և դիվանագետների սպասարկման համար, իսկ գրանցման սրահն ընդհանուր առմամբ 46 գրանցակետ կունենա: Նոր տերմինալում նախատեսված է կենտրոնացված ջերմամատակարարում, օդափոխանակության ժամանակակից և բարձրորակ համակարգ:

Տերմինալն իր գործառույթները կկատարի նաև երկրաշարժի դեպքում, առանց որևէ խնդիրների. շենքը 9-բալանոց սեյսմակայունություն ունի: Արտակարգ իրադրությունների դեպքում արտաքին աշխարհի հետ անխափան կապի ապահովումն օդանավակայանի բարեկարգման նպատակներից մեկն է:

«Զվարթնոց» միջազգային օդանավակայանի բարեկարգման աշխատանքներն իրականացվում են 2002 թվականից «Արմենիա – Միջազգային օդանավակայաններ» ՓԲԸ կողմից` 2001 թվականին ՀՀ կառավարության կողմից տրամադրված 30-ամյա կոնցեսիոն կառավարման համաձայն: Ներդրումային ծրագրի արժեքը կազմում է մոտ 160 մլն ԱՄՆ դոլար: Այսօրվա դրությամբ օդանավակայանը տարեկան 1 միլիոն 100 հազար ուղևոր է սպասարկում, նոր տերմինալը շահագործման հանձնելուց հետո այն կկարողանա մինչև 3.5 միլիոն ուղևոր սպասարկել: