Այլեւս կարիք չկա, որպեսզի ԱՄՆ նախագահության թեկնածուները արծարծեն Ցեղասպանության հարցը

Հայ-թուրքական սահմանը փակել է Թուրքիան, ինքն էլ պետք է բացի: Թուրքիան իրավունք չունի որեւէ բան պահանջել հայ ժողովրդից սահմանը բացելու դիմաց:

Ավելին, սահմանի բացումը կարող է բացասաբար անդրադառնալ Հայաստանի տնտեսության վրա: ՀՀ խորհրդարանը անհապաղ պետք է օրենք ընդունի, որով կարգելվի շրջանների եւ ռազմավարական ռեսուրսներ պարունակող հողերի վաճառքը կամ վարձակալության հանձնումը օտարերկրյա ընկերություններին: Այդպիսի օրենքը կապահովի պետության տնտեսական եւ ռազմավարական անվտանգությունը:

Պարզամտություն կլինի մտածել, թե ֆուտբոլային խաղի համատեղ դիտումը, մշակութային ծրագրերի փոխանակումը, համերգները, ոչ կառավարական կազմակերպությունների հանդիպումները կարող են հաշտեցման հանգեցնել: Կան լուրջ խնդիրներ, որոնք երգ ու պարով չես լուծի` ղարաբաղյան հակամարտության կարգավորումը, Հայոց ցեղասպանության եւ նրա հետեւանքների ճանաչումը, տարածքային պահանջները: Թուրքիայի նախագահը Երեւան էր ժամանել իր երկրի ֆուտբոլային թիմին աջակցելու համար: Մերժելով Հայաստանի նախագահի առաջարկը, Թուրքիան չափազանց անբարենպաստ վիճակում կհայտնվեր Արեւմուտքի աչքերում:

Ես չեմ կարծում, թե Հայաստանի նախագահը պետք է ընտրի ԼՂՀ-ի կամ Հայոց ցեղասպանության միջեւ: Սրանք երկու տարբեր, սակայն համարժեք կարեւորության հարցեր են: Թուրքիան չպետք է զիջումներ ակնկալի Հայաստանից Հայոց ցեղասպանության ճանաչման հարցում, դա պատմական փաստ է: Թուրքիան ուղղակի պետք է սեփական պատմության, նրա ամոթալի էջերի հետ հաշտվելու քաջություն ունենա:

Ես կցանկանայի հիշեցնել, որ Կոնգրեսն արդեն իսկ երկու անգամ բանաձեւեր է ընդունել Հայոց ցեղասպանությունը ճանաչելու վերաբերյալ` 1975 եւ 1984թթ.: Հայերը չպետք է ամեն մի նորընտիր Կոնգրեսից պահանջեն ճանաչել այն, ինչ երկու անգամ արդեն ճանաչվել է: Նույնն է նաեւ ԱՄՆ-ի նախագահների պարագայում: Դեռեւս 1981թ. նախագահ Ռեյգանի ուղերձում հիշատակվել է Հայոց ցեղասպանությունը: Ես կարծում եմ, որ այլեւս նախագահական ուղերձներ կամ Կոնգրեսի բանաձեւեր հարկավոր չեն: Հայ ժողովուրդը չպետք է մշտապես խնդրի նախագահության թեկնածուներին ճանաչել Ցեղասպանությունը:

Իրականում մեզ պետք է, որ ԱՄՆ-ն արդար միջնորդ լինի ղարաբաղյան հակամարտության կարգավորման գործում, ավելի շատ օգնություն հատկացնի ՀՀ-ին ու ԼՂՀ-ին: ԱՄՆ-ն պետք է կոչ անի Թուրքիային պաշտպանել հայ փոքրամասնության իրավունքները եւ վերադարձնել հայկական պատմական եկեղեցիները Կոնստանդինոպոլսի (Ստաբուլի) հայկական պատրիարքությանը: