Հայաստանի տրանսպորտի և կապի նախարար Մանուկ Վարդանյանը առաջիկա խորհրդարանական ընտրություններում ինքնաբացարկ է հայտնել «Օրինաց երկիր» կոալիցիոն կուսակցության համամասնական ցուցակից:
Ինչպես հաղորդել է ԿԸՀ նախագահ Տիգրան Մուկուչյանը, Մանուկյանն այդ որոշումը բացատրող ոչ մի պատճառ չի բերել իր հայտարարության մեջ` հղելով միայն օրենքով իրեն տրված իրավունքին:
Բացի Մանուկյանից այսօր ինքնաբացարկի դիմում են ներկայացրել «Օրինաց երկրի» համամասնական ցուցակի ևս 4 անդամներ` Կարինե Սարիկյանը, Մարգարիտա Հակոբյանը, Սուսաննա Աբրահամյանն ու Մհեր Համբարձումյանը:
Խորհրդարանական ընտրությունները Հայաստանում տեղի կունենան մայիսի 6-ին: Ընտրություններին մասնակցում են ութ քաղաքական ուժեր՝ Հայաստանի Հանրապետական կուսակցությունը (ՀՀԿ), «Բարգավաճ Հայաստան» կուսակցությունը (ԲՀԿ), ՀՅ «Դաշնակցությունը» (ՀՅԴ), «Օրինաց երկիր» կուսակցությունը (ՕԵԿ), «Ժառանգությունը», Հայաստանի Դեմոկրատական կուսակցությունը (ՀԴԿ), Հայաստանի Կոմունիստական կուսակցությունը, «Միավորված հայեր» կուսակցությունը և մեկ նախընտրական դաշինք ի դեմս ընդդիմադիր Հայ ազգային կոնգրեսի (ՀԱԿ):
«Օրինաց երկիր» կուսակցության համամասնական ցուցակը գլխավորում են Ազգային անվտանգության խորհրդի քարտուղար Արթուր Բաղդասարյանը, խորհրդարանական խմբակցության ղեկավար Հեղինե Բիշարյանը և ԱԻ նախարար Արմեն Երիցյանը:
