Ոստիկանությունը միջոցներ է ձեռնարկում` պարզելու Գոհար Վեզրիյանի հաղորդած տեղեկության հավաստիությունը

PanARMENIAN.Net - Ոստիկանության Էրեբունու բաժնում ընդունվել և գրանցվել է Գոհար Վեզիրյանի կողմից արված հայտարարությունը` կապված թիվ 12 ընտրատարածքում պատգամավորության ԲՀԿ-ական թեկնածու Լյովա Խաչատրյանի օգտին ընտրակաշառք բաժանելու վերաբերյալ:

Ոստիկանության կողմից ձեռնարկվում են օպերատիվ հետախուզական միջոցառումներ` պարզելու տեղեկության հավաստիությունը:

Գոհար Վեզիրյանը ահազանգել էր դատախազության թեժ գիծ և Կորյուն Փիլոյանին հայտնել, որ Էրեբունի փողոցի վրա գտնվող Կադաստրի շենքի հարևանությամբ գտնվող բիլիարդանոցում այս պահին 10 հազարական դրամ են բաժանում ԲՀԿ թեկնածու Լյովա Խաչատրյանի համար:

Ընտրություններին մասնակցում են ութ քաղաքական ուժեր՝ Հայաստանի Հանրապետական կուսակցությունը (ՀՀԿ), «Բարգավաճ Հայաստան» կուսակցությունը (ԲՀԿ), «Հայ յեղափոխական դաշնակցություն» կուսակցությունը (ՀՅԴ), «Օրինաց երկիր» կուսակցությունը (ՕԵԿ), «Ժառանգությունը», Հայաստանի Դեմոկրատական կուսակցությունը (ՀԴԿ), Հայաստանի Կոմունիստական կուսակցությունը, «Միավորված հայեր» կուսակցությունը և մեկ նախընտրական դաշինք ի դեմս ընդդիմադիր Հայ ազգային կոնգրեսի (ՀԱԿ):

Ընդ որում, եթե ընտրությունների մասնակից կուսակցությունները պետք է հաղթահարեն 5 տոկոսի շեմը, ապա ՀԱԿ-ը` որպես բլոկ, պետք է հաղթահարի 7 տոկոսի շեմը:

Հայաստանում ընտրություններին հետևելու են 647 միջազգային և 31 հազար տեղական դիտորդներ, ինչը հայկական ընտրությունների համար աննախադեպ թիվ է: Ինչ վերաբերում է միջազգային դիտորդներին, ապա Հայաստանում խորհրդարանական ընտրություններին հետևելու համար իրենց առաքելություններն են ուղարկել ԵԱՀԿ/ԺՀՄԻԳ-ը (258 դիտորդ),ԵԱՀԿ Խորհրդարանական վեհաժողովը(69), ԵԽԽՎ (37), ԱՊՀ Միջխորհրդարանական վեհաժողովը (22), ԱՊՀ Դիտորդական առաքելությունը (151), ինչպես նաև Ընտրական համակարգերի միջազգային հիմնադրամը (IFES) և SILBA միջազգային կազմակերպությունը:

Նախնական արդյունքները կհրապարկվեն քվեարկությունից առնվազն 24 ժամ անց, իսկ վերջնական արդյունքները` քվեարկության 7-րդ օրը: