Լևոն Տեր-Պետրոսյանը քվեարկել է լավ Հայաստանի համար

  6 մայիսի 2012 - 12:58 AMT

PanARMENIAN.Net - ՀՀ առաջին նախագահ Լևոն Տեր-Պետրոսյանը ԱԺ ընտրություններին մասնակցել է 9/11 ընտրատեղամասում: Լրագրողների հարցին՝ ինչ Հայաստանի համար է քվեարկել, նա պատասխանեց. «Լավ Հայաստանի»:

Ըստ նրա՝ սպասվում են լավ ընտրություններ. «Եթե լինեն լավ ընտրություններ, մենք կընդունենք ցանկացած արդյունք»: Տեր-Պետրոսյանը հրաժարվեց գնահատել ՀԱԿ հնարավորություններն այս ընտրություններում՝ նշելով, որ դա կարող է դիտվել որպես քարոզչություն: Խոսելով ընտրությունների ընթացքի և ընտրակեղծիքների մասին, առաջին նախագահն ասաց, որ դեռ տեղյակ չէ և պետք է նոր ծանոթանա:

Լրագրողները հետաքրքրվեցին նաև Լևոն Տեր-Պետրոսյանի առողջությամբ, ինչին վերջինս պատասխանեց, որ իրեն հիասքանչ է զգում:

Ընտրություններին մասնակցում են ութ քաղաքական ուժեր՝ Հայաստանի Հանրապետական կուսակցությունը (ՀՀԿ), «Բարգավաճ Հայաստան» կուսակցությունը (ԲՀԿ), «Հայ յեղափոխական դաշնակցություն» կուսակցությունը (ՀՅԴ), «Օրինաց երկիր» կուսակցությունը (ՕԵԿ), «Ժառանգությունը», Հայաստանի Դեմոկրատական կուսակցությունը (ՀԴԿ), Հայաստանի Կոմունիստական կուսակցությունը, «Միավորված հայեր» կուսակցությունը և մեկ նախընտրական դաշինք ի դեմս ընդդիմադիր Հայ ազգային կոնգրեսի (ՀԱԿ):

Ընդ որում, եթե ընտրությունների մասնակից կուսակցությունները պետք է հաղթահարեն 5 տոկոսի շեմը, ապա ՀԱԿ-ը` որպես բլոկ, պետք է հաղթահարի 7 տոկոսի շեմը:

Հայաստանում ընտրություններին հետևելու են 647 միջազգային և 31 հազար տեղական դիտորդներ, ինչը հայկական ընտրությունների համար աննախադեպ թիվ է: Ինչ վերաբերում է միջազգային դիտորդներին, ապա Հայաստանում խորհրդարանական ընտրություններին հետևելու համար իրենց առաքելություններն են ուղարկել ԵԱՀԿ/ԺՀՄԻԳ-ը (258 դիտորդ),ԵԱՀԿ Խորհրդարանական վեհաժողովը(69), ԵԽԽՎ (37), ԱՊՀ Միջխորհրդարանական վեհաժողովը (22), ԱՊՀ Դիտորդական առաքելությունը (151), ինչպես նաև Ընտրական համակարգերի միջազգային հիմնադրամը (IFES) և SILBA միջազգային կազմակերպությունը:

Նախնական արդյունքները կհրապարկվեն քվեարկությունից առնվազն 24 ժամ անց, իսկ վերջնական արդյունքները` քվեարկության 7-րդ օրը: