ԱՄՆ նախագահական ընտրություններից առաջ Իրանի և ԱՄՆ-ի միջև ռազմական գործողություններից զերծ մնալու պայմանավորվածություն է եղել: Այս տեսակետն այսօր լրագրողների հետ հանդիպմանը հայտնեց իրանագետ Արմեն Իսրայելյանը:«Իսրայելի հետախուզական ծառայության ներկայացուցիչները և նախին ղեկավարները նույնպես միանշանակ կողմ չեն արտահայտվում իրանական հարցը ռազմական ճանապարհով լուծելու ղեկավարության հայտարարություններին», - նշեց Իսրայելյանը:
Իրանագետ Ռուդիկ Յարալյանն էլ` անդրադառնալով մայիսի 23-ին Բաղդադում կայանալիք Իրանի եւ «վեցնյակի» միջև բանակցությունների հաջորդ փուլին, ասաց, որ դրանից առաջ «ականատես ենք դառնում Իրանի նկատմամբ սահմանափակումների մեծացմանը»:
«Որոշակի ակտիվություն է նկատվում նաև Իրանի հարևանների կողմից, որոնք այդպիսով իրենց վերաբերմունքն եմ արտահայտում Իրանի շուրջ ծավալված խնդիրների նկատմամբ», - ասաց իրանագետը:
Իրանագետը նաև նկատեց, որ ի տարբերություն Իսրայելի` Ռուսաստանն ու Չինաստանը կողմ են լուծել այս հարցը դիվանագիտական ճանապարհով , սակայն «սա չի նշանակում թե հետագայում չի կարող ստեղծվել այնպիսի իրավիճակ, որ Ռուսաստանն ու Չինաստանն այլևս չկանգնեն Իրանի թիկունքին»:
«Այդպիսի իրավիճակ կարող է ստեղծվել այն պարագայում, եթե Իրանի նկատմամբ հապճեպ և անհաշվենկատ պատերազմ սկսվի: Տվյալ պարագայում Ռուսաստանն ու Չինաստանյը կորդեգրեն չեզոք քաղաքականություն, հաշվի առնելով այն հանգամանքը, որ կողմերից որևէ մեկը կարող է արդյունքի չհասնել», - իր կարծիքը հայտնեց Յարալյանը:
Իրանագետը նաև հավելեց, որ խոսելով վերոնշյալ երեք երկրների միջև համագործակցության մասին` պետք է հիշել նաև նրանց միջև մրցակցության մասին:
