Փաստաբանի որակավորման քննություններին այս տարի դիմորդների քանակն աննախադեպ է

PanARMENIAN.Net - Երևանի ամերիկյան համալսարանում այսօր փաստաբանի որակավորման քննությունների վերջին օրն է: ՀՀ փաստաբանների պալատի փաստաբանների որակավորման հանձնաժողովի անդամ Ապետնակ Պողոսյանը PanARMENIAN.Net ի թղթակցի հետ զրույցում ասաց, որ փաստաբանի որակավորում ստանալու համար այս տարի դիմորդների քանակն աննախադեպ է. «Սովորաբար, ամեն տարի փաստաբանի որակավորում ստանալու համար ունենում ենք 300-330 դիմող, իսկ այս տարի դիմել են 391 հոգի, որոնցից 10-ը մերժվել են փաստաթղթերի հետ կապված խնդիրների կամ աշխատանքային համապատասխան փորձ չունենալու պատճառով, ևս մի քանիսը այլ պատճառներով: Ընդհանուր, փաստաբանի որակավորման համար այս տարի կա 378 հավակնորդ»:

Դիմորդների թվի նման աճը հանձնաժողովի անդամը բացատրեց նրանով, որ սա այս կարգով անցկացվող վերջին քննությունն է և այս ընթացակարգով այլևս փաստաբանի արտոնագիր չի տրվելու. «Օգոստոսից գործելու է փաստաբանական դպրոց և փաստաբանի արտոնագրի համար դիմորդներն արդեն դիմելու են այդ դպրոցը»,–ասաց նա։ Քննության անցկացման այս ձևի հիմնական առավելությունն, հանձնաժողովի անդամի խոսքով, այն է, որ ի տարբերություն նախկինի, երբ քննություններն անցկացվում էին ոչ թե համակարգիչների, այլ թղթերի միջոցով, և մեծ էր սխալվելու հավանականությունը ու նաև ժամանակատար էր, իսկ «այժմ գործընթացն արագացել է, քննության տևողությունը 2,5 ժամ է, իսկ քննության մասնակիցներն արդեն 15 րոպե անց ավարտում են իրենց աշխատանքները:

Դիմորդներն իրենց քննության պատասխանը` հավաքած միավորների քանակն, իմանում են քննությունից անմիջապես հետո:

Բավարար միավորներ հավաքած հավակնորդները պետք է հանձնեն որակավորման քննության բանավոր փուլը, որից հետո նոր կստանան իրենց արտոնագրերը և կկոչվեն փաստաբան: