2013թ. ամռանը կհիմնանորոգվի Սիրահարների այգու ամֆիթատրոնը

PanARMENIAN.Net - 2013թ. ամռանը Սիրահարների այգու ամֆիթատրոնը կհիմնանորոգվի և կվերազինվի: Ինչպես այսօր Ճարտարապետների միությունում հանրային քննարկման ժամանակ նշեց հիմնադրամի տնօրեն Սարհատ Պետրոսյանը, 1 մլն դրամ նախահաշվային արժեքով աշխատանքները կիրականացվեն «Պողոսյան պարտեզներ» հիմնադրամի` Սիրահարների այգու կայուն զարգացման եռամյա ծրագրի շրջանակում: Ամֆիթատրոնի ներկա կառուցվածքը 2008 թվականին է իրականացվել։ Շահագործման ընթացքում առաջացել են մի շարք տեխնիկական խնդիրներ, մասնավորապես ժամանակավոր լուսային ու ձայնային համակարգերի տեղադրման աշխատանքների ընթացքում։ Նախատեսվում է առկա կառույցի հիմնանորոգման հետ զուգահեռ այն համապատասխանեցել համերգների համար նախատեսված ժամանակակից պայմաններին։

2014թ. ամռանը նախատեսվում է նաև զարգացնել այգու լճի հիդրոտեխնիակական համակարգը: 6 մլն նախահաշվային արժեքով այդ աշխատանքները նույնպես իրականացվելու են այգու կայուն զարգացման եռամյա ծրագրի շրջանակում: Այգու տարածքում գտնվող լճի շահագործումը իրենց ներկայացնում է բավականին աշխատատար գործընթաց։ Ջրի պոմպերի աշխատանքի համար ապրիլ – հոկտեմբեր ամիսներին մեկ օրվա ընթացքում մոտավորապես 30 անգամ մաքրվում են պոմպերի ցանցերը՝ սպառելով մարդկային մեծ ուժ։ Նախատեսվում է տեղադրել ստորգետնյա մաքրման կայան, որը հնարավորություն կտա իրականացնել մաքրման աշխատանքներն օրական մեկ անգամ, որի արդյունքում հնարավոր է խնայել կես դրույք աշխատուժ։ Այդ աշխատանքների ընթացքում փոխվելու է նաև լճի հատակի ծածկույթը՝ դյուրին դարձնելով դրա մաքրումը։

Դրա հետ մեկտեղ 2014թ.ամռանը կամ աշնանը «Պողոսյան պարտեզներ» հիմնադրամը նախատեսում է տեխնիկական շինություն կառուցել այգու աշխատակազմի համար: Նախահաշվային արժեքը 10 մլն դրամ է:

Մինչ այգու շահագործումը նախագծով նախատեսված է եղել միայն մեկ կառույց՝ այգեպանի համար։ Սակայն այգու շահագործման առաջին տարիները ցույց տվեցին որ այգու շահագործման և պահպանության համար անհրաժեշտ է մոտ 10 հոգանոց աշխատակազմ։ Այդ իսկ պատճառով 2009-2010 թվականներին կառուցվեցին ժամանակավոր տաղավարներ այգու հարավ-արևմտյան մասում՝ հասարակական զուգարանի հետնամասում։ Այժմ նախատեսվում է կառուցել հիմնական շինություն հասարակական զուգարանի հետնամասում, ինչպես նաև զուգարանի կիսով չափ ստորգետյա թևի տանիքին։ Այն հնարավորություն կտա այգու աշխատակազմի համար ապահովել հանդերձարան (4 քմ), ցնցուղարան իր սանհանգույցով (2 քմ), խոհանոցային մաս (4 քմ), հանգստի (ընդհանուր) մաս (10 քմ), պահեստային մաս (5 քմ)։ Նախատեսվում է նաև այգու ծաղկային գեղարվեստական ձևավորումների համար կազմակերպել ջերմոցային մաս (հասարակական զուգարանների տանիքին), որը միայն ձմռան ամիսներին աշխատելով հնարավորություն կտա աճեցնել այգու համար անհրաժեշտ ծաղիկները տեղում։ Այն ոչ միայն էականորեն կնվազեցնի ծաղիկների ձեռք բերման հետ կապված ծախսերը, այլև հնարավորություն կտա այդ աշխատանքներին հաղորդել էլ ավելի նորարարական շունչ։