Այսօր Էջմիածնում «Վաչե և Թամար Մանուկյան» նորակառույց մատենադարանում տեղի ունեցավ Հայկական բարեգործական ընդհանուր միության (ՀԲԸՄ) 87-րդ ժողովը: Միության հիմնադիր ժողովն անցկացվել է 1906 թ-ի ապրիլի 15-ին` Կահիրեում, հիմնադիր և առաջին նախագահ Պողոս Նուբար Փաշայի տանը: Այսօր արդեն միության նախագահը Պերճ Սեդրակյանն է, որը` պատասխանելով PanARMENIAN.Net-ի թղթակցի հարցին, դժվարացավ առանձնացնել վերջին երկու տարվա գլխավոր գործը:
«Այժմ մենք վերջին երկու տարվա գործունեությունն ենք ամփոփում: Այդ ընթացքում բազմաթիվ գործեր ենք կատարել. դժվար է առանձնացնել գլխավորը, բայց հիմա մեր գլխավոր մտահոգությունը սիրիահայերն են», - նշեց Սեդրակյանը:
Պերճ Սեդրակյանը հավելեց նաև, որ հիմնադրման օրից մինչ օրս ՀԲԸՄ գլխավոր խնդիրներն են շարունակում մնալ Ցեղասպանության ճանաչումը և հատուցումը, Արցախի հիմնահարցի խաղաղ լուծումը, Հայաստանի տնտեսական աճին նպաստելուն ուղղված գործունեությունը:
Ժողովին ներկա ՀՀ վարչապետ Տիգրան Սարգսյանն առանձնացրեց միության կողմից կատարվող ներդրումը հատկապես կրթության ոլորտում:
«ՀԲԸՄ-ն առանձնանում է նրանով, որ այն չդարձավ համայնքային կազմակերպություն, այլ սփռվեց աշխարհով մեկ` միավորելով հայության խնդիրներով մտահոգ մարդկանց: ՀԲԸՄ աշխատանքը տեսանելի է ինչպես Հայաստանում, այնպես էլ Սփյուռքում, իսկ ամենակարևոր ձեռքբերումը ժողովրդի վստահությունը և սերն են», - ասաց վարչապետը:
Տիգրան Սարգսյանը ՀԲԸՄ նախագահներից Ալեք Մանուկյանի օրինակով հայ մեծահարուստներին կոչ արեց իրենց ձեռքբերումներից բաժին հանել նաև հայրենիքին:
Միջոցառմանը ներկա ՀՀ սփյուռքի նախարար Հրանուշ Հակոբյանը ևս բարձր գնահատեց բարեգործական ընդհանուր միության գործունեությունը, հատկապես` սիրիահայերի հարցում: