«Խաչիկյանի գործով» պետությանը հասցված վնասի մի մասը վերականգնվել է

PanARMENIAN.Net - ՀՀ ոստիկանության քննչական գլխավոր վարչության հատկապես կարևոր գործերով քննության վարչությունում ՀՀ աշխատանքի և սոցիալական հարցերի նախարարության սոցիալական ապահովության պետական ծառայության պաշտոնատար, պատասխանատու աշխատակիցների կողմից չարաշահումներ թույլ տալու դեպքի առթիվ քննվող քրեական գործով վերջին մեկ ամսվա ընթացքում կատարված նախաքննության ընթացքում քրեական գործից անջատվել է 5 քրեական գործ՝ 14 անձի վերաբերյալ, որոնցից 4-ի նկատմամբ որպես խափանման միջոց կիրառվել է կալանավորումը։ ՀՀ ոստիկանության հասարակայնության հետ կապերի և լրատվության վարչությունից հայտնում են, որ՝ անջատված քրեական գործերը ՀՀ քրեական օրենսգրքի 179-րդ հոդվածի 2-րդ, 3-րդ մասի, 325-ոդ հոդվածի 1-ին մասի՝ յուրացման եղանակով խոշոր և առանձնապես խոշոր չափերով կենսաթոշակի գումարներ հափշտակելու, փաստաթղթեր կեղծելու հատկանիշներով մեղադրական եզրակացությամբ ուղարկվել են Ավան և Նոր-Նորքի, Էրեբունի և Նուբարաշեն, Շենգավիթի և Մալաթիա-Սեբաստիայի վարչական շրջանների ընդհանուր իրավասության դատարաններ։

Ընդհանուր առմամբ նախաքննության ընթացքում հարցաքննվել է 8190 անձ, այդ թվում՝ ՀՀ սոցիալական ապահովության պետական ծառայության և ծառայության տարբեր ստորաբաժանումների աշխատակիցներ, կենսաթոշակառուներ, վերջիններիս հարազատներ ու հարևաններ: Որպես մեղադրյալ ներգրավված 51 անձանցից 28-ի վերաբերյալ 9 քրեական գործ մեղադրական եզրակացությամբ ուղարկվել է դատարան, վնասը վերականգնելուց հետո 7 անձի վերաբերյալ քրեական հետապնդումը դադարեցվել է չարդարացնող հիմքով:

Հանցագործությամբ պետությանը պատճառված վնասը կազմում է 327.441.206 դրամ, որից վերականգնվել է 51.773.902 դրամը, դատարան ուղարկված քրեական գործերով պետությանը պատճառված 64.578.984 դրամ վնասից վերականգնվել է 24.704.022 դրամը։

Այս պահին քրեական գործով մեղադրյաները 16-ն են (2-ը՝ հետախուզվող), որոնցից 9-ի նկատմամբ որպես խափանման միջոց է կիրառվել կալանավորումը։

Նշենք, որ Սոցիալական ապահովության պետական ծառայության նախկին ղեկավար Վազգեն Խաչիկյանն այժմ ձերբակալված է: Նրան մեղադրանք է ներկայացվել ՀՀ ՔՕ-ի 179 հոդված 3 մասի 1 և 2 կետերով(կազմակերպված խմբի կողմից առանձնակի մեծ չափերով յուրացում կամ հափշտակում), 178 հոդվածի 3 մասի 1 կետով (առանձնակի մեծ չափերով մեքենայությունների իրականացում) և 314 հոդվածով (պաշտոնական դիրքի չարաշահում):