Ծաղկաձորում ընթացող Հայաստանի դահուկավազքի առաջնության երրորդ օրը մեդալներ են խաղարկվել 15 կմ և 10 կմ ազատ ոճ ձևերում: Հայաստանի առաջնությունն ընդգրկված է դահուկային սպորտի միջազգային ֆեդերացիայի օրացուցային պլանում, և մասնակցում են նաև երկու մարզիկներ Չեխիայից և Ավստրալիայից:
Ավստրալուհի Գրիմեռ Լեսինցկան բավական հաջող է մասնակցում առաջնությանը և այսօր իր 3-րդ մեդալն է նվաճել: Այս անգամ նա ուժեղ է եղել 10 կմ ազատ ոճում: 2-րդ տեղում ելույթն ավարտել է Կատյա Գալստյանը, իսկ Սյուզաննա Վարոսյանը նվաճել է բրոնզե մեդալ:
15 կմ ազատ ոճում կրկին հավասարը չի ունեցել Սերգեյ Միքայելյանը: Գոռիկ Գևորգյանն ու Մյասնիկ Ղարիբյանն էլ զբաղեցրել են 2-րդ և 3-րդ տեղերը:
PanARMENIAN.Net-ի թղթակցին Հայաստանի դահուկային սպորտի ֆեդերացիայի պատասխանատու քարտուղար Գագիկ Սարգսյանն ասել է, որ վաղը` առաջնության վերջին օրը, կայանալու է տղամարդկանց և կանանց 4х5 կմ փոխանցումավազքը:
