«Վանաձորն իմ պատասխանը տվեց: Շնորհավորում եմ ձեր և մեր բոլորի հաղթանակը», - Վանաձորում իր ելույթն այս խոսքերով սկսեց «Ժառանգության» առաջնորդ Րաֆֆի Հովհաննիսյանը:
«Մեր պապերը հենց այստեղ, այս հրապարակում փրկեցին Հայաստանը, իսկ դուք փետրվարի 18-ին փրկեցիք մեր երկիրը, մեր ապագա սերունդը ու ասացիք, որ սա իմ Վանաձորն է, իմ Լոռին է», - ասաց Հովհաննիսյանը:
Նա ևս մեկ անգամ հորդորեց ոստիկաններին իրեն «նկարել», բայց «հանկարծ Հայաստանի քաղաքացիներին չվախեցնել» ու վաղը չսահմանափակել ժողովրդի տեղաշարժվելու իրավունքը:
«Եթե ձեր գործունեության մեջ սխալ հրաման իրականացնեք, պատասխան եք տալու օրենքի առաջ», - ասաց Հովհաննիսյանը:
Անդրադառնալով Վանաձորի քաղաքապետի հրաժարականի մասին տարածված լուրերին, «Ժառանգության» առաջնորդը նախապես ներողություն խնդրեց նրանից, եթե դրանք չեն համապատասխանում իրականությանն ու ասաց.
«Եթե ինքն ասել է, որ հայ ժողովուրդը, Հայաստանի քաղաքացին անգիտակից է և դրա արդյունքում ինքը հաղթել է, ուրեմն նա անելիք չունի մեր հանրապետությունում», - եզրափակեց Րաֆֆի Հովհաննիսյանը՝ հավելելով, որ եկել է ասել շնորհակալություն:
Նա հիշեցրեց, որ վաղը հավաքվելու են Ազատության հրապարակում ու ուղևորվեց Գյումրի:
