Օբյեկտիվ. Երբ նորաձև է ավանդականը. Թաղիքագործությունը Հայաստանում վերածնվում է (վիդեո)

 29 մայիսի 2013 - 18:41 AMT

PanARMENIAN.Net - Ոչ վաղ անցյալում հայ կանայք որևէ իր կարելու համար հումքը ոչ թե խանութներում էին փնտրում, այլ ստանում էին իրենց ձեռքով: Բուրդ, օճառ, ջուր, համբերություն ու ժամանակ: Ահա այն ամենն, ինչ հարկավոր է թաղիք ստանալու համար: Ասում են՝ թաղիքը բացի որակյալ հագուստի ու ոտնամանի հումք լինելուց, նաև բուժիչ հատկություն ունի:

Տարիներ առաջ Գավառում թաղիքագործության հետքեր փնտրող խումբը, որտեղ նաև մեր այսօրվա զրուցակիցը՝ Լալա Մնեյանն էր, հյուրընկալվում է մի ընտանիքի, որտեղ թաղիքե կարպետի մի անկյունը կտրված ու կարված է լինում: Տանտերերը պատմում են, որ երբ համագյուղացիներից մեկը տառապում էր ողնաշարի ինչ-որ հիվանդությամբ, նրանք թաղիք էին փնտրում հիվանդի մեջքին կապելու համար, իրենք էլ օգնում՝ կտրելով ու նրանց տալով նախնիներից ժառանգություն ստաացած կարպետի մի հատվածը, իսկ երբ հիվանդը առողջացավ, կտորը հետ վերադարձրեցին տանտերերին ու կարեցին իր տեղում:

Թաղիքագործության հին նմուշներ փնտրելուց, նորաձև զարդեր պատրաստելուց ու հագուստ կարելուց բացի, տիկին Լալան իր գիտելիքնրը նաև երիտասարդներին է փոխանցում: Ասում է՝ երիտասարդ կանայք մեծ հաճույքով են սովորում, բայց ափսոսում է, որ ոչ բոլորին դասավանդելու հնարավորություն կա:

Առայժմ Լալա Մնեյանի ղեկավարած «Կենաց տանը» թաղիքագործություն են սովորում սոցիալական խոցելի խմբերի ներկայացուցիչներ: Հաշվի առնելով այն, որ դասերը անվճար են, ընտրվում են մարդիկ, ում այս զբաղմունքը կարող է օգնել կենցաղային խնդիրներ լուծելու հարցում, թեև մեր հերոսը նշում է, որ դպրոց հիմնելու, գործն ավելի ընդլայնելու մեծ ցանկություն կա. առայժմ հնարավոություններն են սուղ: