ՀՀ ԱԳ նախարարի տեղակալ. Հայաստանը մշտապես հանդես է գալիս հօգուտ զանգվածային ոչնչացման զենքի չտարածման

PanARMENIAN.Net - Մայիսի 27-29-ը ՀՀ ԱԳ նախարարի տեղակալ Աշոտ Հովակիմյանը մասնակցեց և ելույթ ունեցավ Վարշավայում տեղի ունեցած Տարածման անվտանգության նախաձեռնության (Proliferation Security Initiative) Բարձր մակարդակի քաղաքական հանդիպմանը` նվիրված նախաձեռնության տասնամյակին: Հանդիպումը կազմակերպվեց Լեհաստանի ԱԳ նախարարության կողմից` ոլորտը համակարգող ԱԳ փոխնախարարների և պաշտպանության փոխնախարարների մակարդակով:

Իր ելույթում ՀՀ ԱԳ նախարարի տեղակալը շեշտեց, որ Հայաստանի Հանրապետությունը մշտապես հանդես է գալիս հօգուտ զանգվածային ոչնչացման զենքի չտարածման և ապօրինի փոխադրումների կանխարգելումն ապահովող առավել արդյունավետ և համակարգված ընթացակարգերի և գործիքների կիրառման: Ներկայացվեցին ԶՈԶ չտարածման և երկակի նշանակություն ունեցող բեռների ապօրինի փոխադրումը և տարանցումը կանխարգելող ՀՀ օրենսդրական փոփոխությունները, ՄԱԿ ԱԽ 1540 բանաձևի կատարման ընթացքը, տարբեր երկրների հետ այս բնագավառում համագործակցությունը:

Ինչպես հայտնում են ԱԳՆ մամուլի ծառայությունից, հանդիպման ավարտին որոշվեց ավելի արդյունավետ դարձնել նախաձեռնության շրջանակներում տեղեկատվության փոխանակումը և մասնակից երկրների միջև համագործակցությունը: Հաջորդ բարձր մակարդակի քաղաքական հանդիպումն անցկացվելու է 2015թ. Վաշինգտոնում:

Նշենք, որ ԶՈԶ տարածման դեմ պայքարի անվտանգության նախաձեռնության ստեղծման մասին պաշտոնապես հայտարարվել է ԱՄՆ նախագահ Ջորջ Բուշի կողմից 2003թ. մայիսի 31-ին Կրակովում (Լեհաստան) կայացած հանդիպման ժամանակ: Տարածման անվտանգության նախաձեռնությունը համաշխարհային նախաձեռնություն է, որի գլխավոր նպատակը` զանգվածային ոչնչացման զենքի, դրա փոխադրող միջոցների և բաղադրիչ տարրերի անօրինական փոխադրումների դեմ պայքարն է տարածման ոլորտում կասկածվող երկրների և ոչ պետական կազմավորումների միջև: Ներկայումս նախաձեռնությանը միացել է 102 պետություն: Հայաստանը նախաձեռնությանը միացել է 2006թ. մարտի 24-ին` հաստատելով արգելման սկզբունքների հայտարարությունը: