Բիթլիսի փողոցներից մեկը Սարոյանի պատվին անվանակոչելու հարցն առկախված է. Ասում են` նահանգապետը դեմ է

Բիթլիսի փողոցներից մեկը Սարոյանի պատվին անվանակոչելու հարցն առկախված է. Ասում են` նահանգապետը դեմ է

PanARMENIAN.Net - Բիթլիսի փողոցներից մեկը ամերիկահայ գրող Վիլիամ Սարոյանի պատվիր վերանվանելու գործընթացը վիճահարույց ընթացք է ստացել:

Բանն այն է, որ դեռևս մարտի 1-ին Թաթվանում «Բիթլիսի հայերը» խորագրով ցուցահանդես էր տեղի ունեցել, որի ընթացքում անգլիաբնակ գիտնական Արա Սարաֆյանը առաջարկել էր փողոցը, որտեղ բնակվել էր Սարոյանի ընտանիքը, անվանել գրողի անունով: Բիթլիսի քաղաքապետարանը տվել էր իր համաձայնությունը, սակայն փողոցի անվանակոչումը դեռևս չի կայացել:

Սարաֆյանի նամակից, որը հոկտեմբերի 15-18-ին ժամանել էր Բիթլիս փողոցի բացմանը մասնակցելու համար, պարզ է դառնում, որ փողոցի անվանակոչմանը դեմ է եղել Բիթլիսի նահանգապետ Օրհան Օզթյուրքը, գրում է Ermenihaber կայքը:

Սարաֆյանը, հղում անելով Բիթլիսի համաքաղաքապետ Նևին Դաշդեմիր Դաղըրքանին, նշում է, որ փողոցի անունը չի փոխվել, քանի որ նահանգապետ Օզթուրքի կարծիքով «Սարոյանը կապ չունի Բիթլիսի հետ»:

«Ագոս» թերթի հետ զրույցում սակայն Դաղըրքանը հերքել է Սարաֆյանի խոսքերը, նշելով, որ վերջինիս հետ հանդիպման ընթացքում ինքը նման բան չի հաղորդել, քանի որ նահանգապետից էլ նման արտահայտություն չի լսել: Հատկանշական է, որ նահանգապետարանը հարցի վերաբերյալ դեռևս որևէ հայտարարություն չի տարածել:

Բիթլիսի քաղաքային խորհուրդը օգոստոսին հաստատել է հինգ փողոցներ վերանվանելու մասին որոշումը: Դրանցից մեկը պետք է անվանակոչվեր ծագումով Բիթլիսից, հանրահայտ ամերիկահայ գրող Վիլյամ Սարոյանի պատվին: Վերջինս թեև ծնվել է Ֆրեզնոյում, ամուր կապ է պահպանել իր նախնիների հայրենիքի հետ և 1964-ին այցելել Արմտյան Հայաստան: 2014-ին նշվում է այցի 50-ամյակը:

Սարոյանի անունով նախատեսվում էր անվանակոչել քաղաքի Սափգոր թաղամասի գլխավոր փողոցը, որտեղ ապրել է գրողի ընտանիքը: Այս թաղամասի շատ տներ դեռ պահպանում են իրենց կառուցման ամսաթիվը հայկական, օսմանյան և արևմտյան համարներով:

Դաղըրքանի տեղեկացմամբ` քաղաքի ավագանու կողմից օգոստոս ամսին փողոցը Սարոյանի անվամբ կոչելու մասին կայացրած որոշումից հետո քաղաքապետրանի և նահանգապետարանի միջև սկսված պաշտոնական գրագրությունը շարունակվում է:

Համաքաղաքապետը նշել է նաև, որ նորից պետք է դիմեն քաղաքի ավագանուն, սակայն այս անգամ քրդական «Խաղաղություն և ժողովրդավարություն» կուսակցության անդամների կողմ ձայները չեն բավարարի դրական արդյունքի համար և անհրաժեշտ կլինի իշխող «Արդարություն և զարգացում» կուսկացության անդամների աջակցությունը:

Վիլյամ Սարոյանը ծնվել է Արևմտյան Հայաստանի Բիթլիս (Բաղեշ) քաղաքից Ֆրեզնո գաղթած հայի ընտանիքում: 4 տարեկանում զրկվել է հորից, որոշ ժամանակ ապրել է որբանոցում: Այնուհետև մայրը որդուն հանել է որբանոցից, կրթության տվել: Ընտանիքի հոգսն ստիպել է պատանուն թողնել դպրոցը և փողոցներում լրագիր վաճառել, ապա դարձել է հեռագրատան ցրիչ: Աշխատանքը, սակայն, նրան չի խանգարել զբաղվելու ընթերցանությամբ, նաև ստեղծագործել է, գրել պատմվածքներ:

Իր գրական կյանքի առաջին տասնամյակում Սարոյանը գրել է հարյուրավոր պատմվածքներ, որոնց մի մասը զետեղվել է ավելի քան 10 ժողովածուում («Փոքրիկ երեխաներ», 1937 թ., «Ողջույն քեզ, սեր», 1938 թ., «Անունս Արամ է», 1940 թ., «Սիրելիս», 1944 թ., և այլն): Դրանք բնական և ճշմարիտ պատկերների ու կերպարների մի ամբողջ շարք են. Սարոյանն ընթերցողի հետ խոսում է պարզ ու մատչելի լեզվով, իր իսկ բնորոշմամբ՝ «մարդկային սրտի համընդհանուր լեզվով, որը հավերժական է և նույնն է բոլորի համար աբմողջ աշխարհում»:

Սարոյանի հերոսներից շատերը հայեր են, որոնք ներկայացնում են հայկական միջավայրը՝ ազգային սովորույթներով ու բարքերով, հայրենիքի պատմական հիշողությամբ: Հայրենիքի թեման, նրա դարավոր ավանդույթները պահպանող մարդկանց ինքնատիպ կերպարները հակադրվում են ամերիկյան ապրելակերպի համահարթեցնող չափանիշներին: Սարոյանի հերոսները, հատկապես մանուկների ու պատանիների տպավորիչ կերպարները, համաշխարհային գրականություն են մտել որպես հոգու մաքրության և անկեղծության խորհրդանիշներ:

 Ուշագրավ
Նա նաև ասել է, որ տարածաշրջանային անվտանգությունը պետք է ապահովեն տարածաշրջանի երկրները
Նա հավելել է, որ թուրքական կողմն ավարտել է Նախիջևանի և Կարսի միջև 224 կմ երկարությամբ երկաթուղային գծի կառուցումը
Փետրվարի 1-ին Միջազգային քրեական դատարանը իրավասություն է ստանալու հետաքննել Ալիևի գործողությունները
Նա նշել է, որ դիտարկում է հայկական բանակին «ոչ մահաբեր ձևաչափով» աջակցություն ցուցաբերելու հնարավորությունը, բայց կոնկրետ որոշումներ չկան
---