ԿԽՄԿ-ն տեղեկացվել է Ադրբեջան անցած հայ զինծառայողի մասին. Դասալքության մասով քրգործ է հարուցվել

23 մարտի 2015 - 13:34 AMT

PanARMENIAN.Net - Կարմիր խաչի միջազգային կոմիտեն տեղեկացվել է, որ հայ զինվոր է հայտնվել Ադրբեջանում և ներկա պահին կապի մեջ է իշխանությունների պատասխանատու ներկայացուցիչների հետ, ասել է ԿԽՄԿ հայաստանյան գրասենյակի հաղորդակցման ծրագրերի ղեկավար Զառա Ամատունին՝ անդրադառնալով ԼՂՀ-ում երեկ պայմանագրային զինծառայողի սահմանն անցնելու դեպքին:

Հարցին, թե տեղեկություն ունե՞ն՝ ինչ վիճակում է զինծառայողը, Զառա Ամատունին պատասխանել է՝ այս պահին որևէ բան ասել չի կարող, գրում է Tert.am-ը:

«Մենք հետևում ենք միջադեպին, առայժմ երկխոսություն ենք վարում և ընդամենը տեղեկացվել ենք տեղի ունեցածի մասին»,-ասել է ԿԽՄԿ հայաստանյան գրասենյակի հաղորդակցման ծրագրերի ղեկավար: Իսկ ՀՀ Քննչական կոմիտեի տեղեկատվության և հասարակայնության հետ կապերի բաժնից տեղեկացնում են, որ հարուցվել է քրեական գործ՝ ՀՀ քրեական օրենսգրքի 362-րդ հոդվածի 2-րդ մասով (դասալքությունը՝ մարտական հերթապահություն կատարող զինծառայողի կողմից)։ Կատարվում է նախաքննություն:

Մարտի 22-ին՝ ժամը 13:50-ի սահմաններում, ՊԲ արևելյան ուղղությամբ տեղակայված զորամասերից մեկի մարտական դիրքից, զենք-զինամթերքը թողնելով մարտական հենակետում, հակառակորդի կողմն է անցել ՊԲ զինծառայող, 1991-ին ծնված շարքային-պայմանագրային Անդրանիկ Արարատի Գրիգորյանը: Դեպքի մանրամասները պարզելու համար կատարվում է քննություն, տեղեկացնում է ԼՂՀ ՊՆ մամուլի ծառայությունը:

ՀՀ ՊՆ մամուլի խոսնակ Արծրուն Հովհաննիսյանը ֆեյսբուքյան իր էջումնշել է՝ Անդրանիկ Գրիգորյանի արարքը մեկնաբանելու չէ․ «Սակայն, կարծում ենք՝ ադրբեջանցիները շուտով կմեկնաբանեն, որ նա միայնակ մինչև ատամները զինված հարձակվել էր Ադրբեջանի վրա և նրանց ասկյարները մի կերպ են չեզոքացրել հայ ռեմբոյին», գրել է նա։

Հղումներ թեմայով.

Կարմիր խաչը տեղեկացվել է Ադրբեջանում հայտնված հայ զինծառայողի մասին և աշխատանքներ է սկսել. Tert.am

Panorama.am: Сотрудники МККК пока не встречались с находящимся в Азербайджане армянским военнослужащим Андраником Григоряном

Ղարաբաղա-ադրբեջանական հակամարտությունը

Ղարաբաղա-ադրբեջանական հակամարտությունը սկսվեց 1988 թվականին: Ի պատասխան Լեռնային Ղարաբաղի ինքնավար մարզի (ԼՂԻՄ) բնակչության 80% կազմող հայերի խաղաղ պահանջներին, Ադրբեջանը ագրեսիա ծավալեց խաղաղ բնակչության դեմ: 1991-1994թթ. ազգային-ազատագրական պատերազմի արդյունքում հռչակվեց Լեռնային Ղարաբաղի Հանրապետությունը: ԼՂՀ պաշտպանության բանակը նաեւ ԼՂՀ շուրջ անվտանգության գոտի ստեղծեց, որը 7 շրջաններ է ներառում: 1994թ. մայիսի 11-ին հրադադարի մասին համաձայնություն ձեռք բերվեց (Բիշկեկյան արձանագրություն): Ներկայումս հակամարտության կարգավորմամբ զբաղվում են ԵԱՀԿ Մինսկի խմբի համանախագահները` Ֆրանսիան, ԱՄՆ-ն եւ Ռուսաստանը: