Դավութօղլուն «նեղացել է» Պուտինից և Օլանդից` Ցեղասպանության 100-րդ տարելիցի միջոցառումներին մասնակցելու համար

Դավութօղլուն «նեղացել է» Պուտինից և Օլանդից` Ցեղասպանության 100-րդ տարելիցի միջոցառումներին մասնակցելու համար

PanARMENIAN.Net - Թուրքիայի վարչապետ Ահմեդ Դավութօղլուն մեկնաբանել է Հայոց ցեղասպանության վերաբերյալ Ռուսաստանի նախագահ Վլադիմիր Պուտինի հայտարարությունը, տեղեկացնում է թուրքական Beyaz gazete թերթի կայքը:

«Մեր արտգործնախարարի հետ խոսել եմ, հարկ եղած դիվանագիտական քայլերը կձեռնարկվեն: Ռուսաստանի ու Ֆրանսիայի նախագահների այցը Հայաստան ստվերում է ԵԱՀԿ Մինսկի խմբում նրանց անկախությանը»,- հայտարարել է նա:

Թուրք վարչապետը նաև նշել է, որ հեռախոսազրույց է ունեցել Գերմանիայի կանցլեր Անգելա Մերկելի հետ: «Թուրքիան և Գերմանիան պատերազմում նույն կողմում էին կռվում: Նրան ասացի, որ պատրաստ եմ բացել մեր բոլոր արխիվները: Եվրոպայի խորհրդարանի քայլն անընդունելի է»,-ասել է նա:

Դավութօղլուն նաև ակնարկել է, որ Թուրքիայում կայանալիք «խաղաղության հավաքին» ավելի մեծ թվով նախագահներ են մասնակցելու, քան Հայաստանում:

Երևանում Հայոց ցեղասպանության 100-րդ տարելիցին նվիրված ոգեկոչման միջոցառումներին մասնակցում են Ռուսաստանի, Ֆրանսիայի, Սերբիայի ու Կիպրոսի նախագահները:

Ապրիլի 22-ին ՌԴ նախագահ Վլադիմիր Պուտինը ուղերձ էր հղել «Աշխարհն առանց ցեղասպանությունների» հուշ երեկոյի մասնակիցներին, հայտնում է Կրեմլի պաշտոնական կայքէջը: Ուղերձում մասնավորապես ասված է. «1915-ի ապրիլի 24-ը սգո ամսաթիվ է, որը կապված է մարդկության պատմության ամենասարսափելի ու ողբերգական իրադարձություններից մեկի՝ հայ ժողովրդի ցեղասպանության հետ:

Հարյուր տարի անց մենք գլուխ ենք խոնարհում այդ ողբերգության զոհերի հիշատակի առաջ, որը մեր երկրում մշտապես ընկալվել է որպես սեփական ցավ ու դժբախտություն:

Ռուսաստանի դիրքորոշումը եղել և մնում է օբյեկտիվ ու հետևողական. ազգային պատկանելության հողի վրա զանգվածայինն սպանությունները չեն կարող արդարացում ունենալ: Միջազգային հանրությունը կոչված է ամեն ինչ անելու, որպեսզի նման ոճրագործությունները երբեք և ոչ մի տեղ չկրկնվեն: Հայերի ու տարածաշրջանի այլ ազգերի նոր սերունդները պետք է ապրեն հաշտ ու խաղաղ՝ զերծ մնալով սարսափներից, որոնց պատճառ են դառնում կրոնական ատելությունը, ագրեսիվ ազգայնականությունն ու այլատյացությունը:

Եղբայրական Հայաստանին, Ռուսաստանում ապրող բոլոր հայերին մաղթում եմ ամենայն բարիք, խաղաղություն և բարգավաճում: Հավերժ հիշատակ զոհվածներին»:

 Ուշագրավ
Ընդգծվել է ուժի կիրառման անընդունելիությունը և կոչ է արվել ձեռնպահ մնալ ռազմատենչ հռետորաբանությունից
«Մեզ ասում էին, թե մեր խոսքերը չափազանց կտրուկ են, որ դա չի մոտեցնում խաղաղությունը»,–բողոքել է նա
Հաջիզադեն ասել է, թե հայտարարությունը «զարմանք է առաջացնում», և մեղադրանքներ հնչեցրել Հայաստանի հասցեին
---