Գրիպը վարակիչ հիվանդություն է, որը տարածվում է օդակաթիլային ճանապարհով: Գրիպի հիմնական ախտանշաններն են՝ ընդհանուր թուլությունը, ջերմությունը, մկանացավերը, հազը, գլխացավը:

Որոնք են գրիպի հիմնական նշանները, որոնց առկայության դեպքում պարտադիր պետք է հրավիրել մանկաբույժի կամ ընտանեկան բժշկի կամ էլ երեխային տանել առաջնային բուժհիմնարկ՝ պոլիկլինիկա/առողջության կենտրոն`

• ջերմության բարձրացում` 380C–ից բարձր

• հազ

• հարբուխ

• կոկորդի ցավ

• գլխացավ •

մկանացավ •

փորլուծություն և փսխում:

Եթե երեխան բժշկի հսկողությամբ բուժում է ստանում տանը, ապա`

• հարկ է երեխային տալ առատ հեղուկներ՝ ջուր, թեյ, հյութեր, կոմպոտ (ոչ շատ քաղցր)

• կարևոր է հսկել մարմնի ջերմաստիճանը և ժամանակին տալ ջերմիջեցնող դեղամիջոցներ՝ պարացետամոլ կամ նուրոֆեն (բժիշկը կարող է նշանակել նաև այլ դեղեր)

• երեխաներին ՉԻ ԿԱՐԵԼԻ տալ «Ասպրիրն» և/կամ «Ասկոֆեն»

• հարկ է մշտապես օդափոխել սենյակը, պահել երեխային չափավոր տաք պայմաններում

• պետք է պահպանել հիգիենայի կանոնները, հաճախակի լվանալ ձեռքերը:

Երբ՞ է անհրաժեշտ երեխային անմիջապես տեղափոխել հիվանդանոց

Երեխային անհապաղ պետք է տեղափոխել հիվանդանոց, եթե վերը ներկայացված գրիպի հիմնական նշաններին ավելանում են`

• առկա է քնկոտ կամ անգիտակից վիճակ

• երեխան չի կարողանում խմել կամ կուրծք ուտել

• շարունակաբար հրաժարվում է հեղուկներ խմելուց

• երեխան փսխում է յուրաքանչյուր կերակրումից կամ հեղուկ ընդունելուց հետո

• առկա են ցնցումներ

• առկա է հաճախացած և/կամ դժվարացած շնչառություն, կապտուկ

• երեխան անսովոր գերգրգռված է

• առկա է ծանր ջրազրկում

• եթե երեխայի տարիքը 2 ամսականից փոքր է

• երեխան ունի որևէ այլ քրոնիկ հիվանդության սրացում:

Մայրաքաղաքի պոլիկլինիկաների ղեկավարների և Երևանի քաղաքապետարանի առողջապահության պատասխանատուների հետ հանդիպման ընթացքում առողջապահության նախարարության արագ արձագանքման խումբը հանգամանալից անդրադարձ է կատարել գրիպով և սուր շնչառական վարակներով պայմանավորված իրավիճակին:

Նախարար Արմեն Մուրադյանը նշել է, որ իրականացված կանխարգելիչ լայնածավալ միջոցառումների և առողջապահական համակարգի արտակարգ ռեժիմով աշխատանքի շնորհիվ, տոնական օրերին հնարավոր եղավ խուսափել տասնյակ ուշացած դեպքերից, խոսել փրկված կյանքերի մասին:

Երևանի քաղաքապետարանի աշխատակազմի առողջապահության վարչության պետ Կամսար Բաբինյանը նշել է, որ տոնական օրերին` հունվարի 12-ը ներառյալ, 12 584 քաղաքացի է դիմել բժշկական օգնության: Նշվել է, որ այժմ գրիպով և սուր շնչառական վարակներով պայմանավորված իրավիճակը հանրապետությունում հանգիստ է:

Խորհրդակցության ընթացքում անդրադարձ է կատարվել դեղերով ապահովվածության գործընթացին: Կարևորվել է բուժումը ճիշտ ընթացակարգերով և սահմանված նորմատիվներով իրականացումը:

Նախարարը հանձնարարել է հատկապես հղիների, ինչպես նաև ապաքինված հիվանդների, երեխաների նկատմամբ սահմանել հսկողություն, իրականացնել համայցեր: Առկա իրավիճակում բժշկական կազմակերպություններում ներհիվանդանոցային վարակները կանխարգելելու և վերջիններս բեռնաթափելու նպատակով Արմեն Մուրադյանը հանձնարարել է ուժեղացնել առաջնային օղակի աշխատանքը, ուր վերջին օրերին արձանագրվել է դիմելության անկում: Ամբուլատոր ցանցը ևս ապահովված է անհրաժեշտ հակավիրուսային դեղերով:

ՀՀ-ում մահվան 10 դեպք է գրանցվել՝ H1N1 վիրուսի ախտանիշով: Երեք հիվանդ մահացել է 2015-ի դեկտեմբերին,յոթը՝ 2016-ին: Հունվարի 13-ին առաջին անգամ սուր շնչառական վարակների դեպքերի նվազում է արձանագրվել: Մինչ այդ ամեն օր նկատվում էր հիվանդության աճ: