Մնացականյանը՝ The Washington Post-ին. Եթե պատերազմը վերսկսվի, հետ կմղենք ու առաջ կշարժվենք

27 ապրիլի 2016 - 11:43 AMT

PanARMENIAN.Net - ԼՂՀ զորքերը լայնածավալ հարձակման ապրիլի 2-ին չէին սպասում, բայց նշանները եղել են: Այս մասին The Washington Post-ին տված հարցազրույցում ասել է Լեռնային Ղարաբաղի պաշտպանության նախարար, գեներալ-լեյտենանտ Լևոն Մնացականյանը:

«Դրանից առաջ, օգոստոսից ի վեր 21 հայ զինվոր է սպանվել և 113 զինվոր վիրավորվել։ Բացի այդ, Ադրբեջանը համալրում էր իր զինանոցը ռուսական նորտանկերով, իսրայելական անօդաչուներով ու թուրքական հրթիռներով »,- ասել է Մնացականյանը, գրում է Tert.am-ը։

Մնացականյանը նշել է նաև, որ հայկական զորքերը կարող են պաշտպանել տարածքն առանց Ռուսաստանի օգնության։

«Քառօրյա պատերազմի արդյունքը ցույց տվեց, որ մեր ունեցած տեխնիկան և մարտական պատրաստությունը թույլ կտան կանգնեցնել ցանկացած հակառակորդի։ Եթե պատերազմը վերսկսվի, մենք ոչ միայն նրան հետ կմղենք, այլև ինքներս առաջ կշարժվենք»,- ասել է նա:

Սյունակագիր Դեյվիդ Իգնատիուսը իր «Ղարաբաղ. վերսկսված հակամարտություն` Կովկասում» հոդվածում նշում է, որ Ղարաբաղյան հակամարտությունն աշխարհի ամենաքիչ քննարկված և ամենադժվար լուծելի խնդիրներից է, գրում է Yerkir.am-ը:

Լրագրողը գրում է. Մոսկվան հայտարարում է, որ ցանկանում է միջնորդել երկարատև խաղաղ կարգավորում, բայց, միաժամանակ, զինում է երկու կողմերին։ Միացյալ Նահանգները նույնպես հույս ունի կանխել ավելի լայն բախումը, բայց քիչ դիվանագիտական լծակներ ունի։

Հեղինակը նշում է, որ այցելել է Ղարաբաղ մի քանի այլ օտարերկրացի լրագրողների և Եվրոպական խորհրդարանի անդամի հետ։ Ըստ նրա՝ Ղարաբաղը կարծես Կովկասի Շվեյցարիան լինի՝ ոչ միայն լեռներով, այլև կոկիկ փողոցներով, սարի լանջերին գյուղացիական տնտեսություններով և անկախ մարդկանցով:

Ապրիլի 26-ի օրվա ընթացքում ղարաբաղա-ադրբեջանական հակամարտ զորքերի շփման գծի ամբողջ երկայնքով հակառակորդի կողմից ձեռնարկված ինտենսիվ հրետակոծությունները շարունակվել են նաև լույս 27-ի գիշերը:

Ադրբեջանական զինուժը իր տրամադրության տակ եղած գրեթե բոլոր հրետանային զինատեսակներից, այդ թվում` ականանետերից, թնդանոթներից ու ՄՄ- 21 (Գրադ) կայանքներից ղարաբաղյան դիրքերի և խաղաղ բնակավայրերի վրա արձակել է ավելի քան 550 արկ: Առավել ինտենսիվ հրետակոծություններ են արձանագրվել շփման գծի հյուսիսարևելյան ուղղությամբ: Հրետակոծության են ենթարկվել Մարտակերտ, Ներքին Հոռաթաղ և այլ խաղաղ բնակավայրեր:

Հակառակորդի կողմից ձեռնարկված ագրեսիվ գործողությունների հետևանքով` մահացու վիրավորում է ստացել ՊԲ զինծառայող, 1996թ. ծնված Հայկ Սամվելի Մինասյանը:

Հղումներ թեմայով.

The Washington Post. Karabakh: A renewed conflict in the Caucasus

Եթե պատերազմը վերսկսվի, մենք առաջ կշարժվենք. Լևոն Մնացականյանը՝ The Washington Post-ի հետ զրույցում. Tert.am

Առջևում երկար, անզիջում հակամարտություն է. The Washington Post-ը՝ Արցախից. Yerkir.am

Ղարաբաղա-ադրբեջանական հակամարտությունը

Ղարաբաղա-ադրբեջանական հակամարտությունը սկսվեց 1988 թվականին: Ի պատասխան Լեռնային Ղարաբաղի ինքնավար մարզի (ԼՂԻՄ) բնակչության 80% կազմող հայերի խաղաղ պահանջներին, Ադրբեջանը ագրեսիա ծավալեց խաղաղ բնակչության դեմ: 1991-1994թթ. ազգային-ազատագրական պատերազմի արդյունքում հռչակվեց Լեռնային Ղարաբաղի Հանրապետությունը: ԼՂՀ պաշտպանության բանակը նաեւ ԼՂՀ շուրջ անվտանգության գոտի ստեղծեց, որը 7 շրջաններ է ներառում: 1994թ. մայիսի 11-ին հրադադարի մասին համաձայնություն ձեռք բերվեց (Բիշկեկյան արձանագրություն): Ներկայումս հակամարտության կարգավորմամբ զբաղվում են ԵԱՀԿ Մինսկի խմբի համանախագահները` Ֆրանսիան, ԱՄՆ-ն եւ Ռուսաստանը: