ՀՀԿ պատգամավոր. «Նախագահն ասել է՝ դիրքեր ենք հետ բերել»

PanARMENIAN.Net - Ապրիլի 27-ին ՀՀԿ խմբակցության պատգամավորների հետ հանդիպման ժամանակ լայնածավալ պատերազմի մասին ՀՀ նախագահ Սերժ Սարգսյանը չի խոսել, բայց ասել է, որ դիրքեր ենք հետ բերել: Այս մասին Խորհրդարանում լրագրողներին ասել է ՀՀԿ խմբակցության պատգամավոր Վազգեն Կարախանյանը:

ՊԲ խոսնակը ապրիլի 27-ին հերքել էր դիրքեր վերադարձնելու մասին լուրը: Կարախանյանը տեղյակ չէ այդ հերքումից, գրում է Aravot.am-ը:

Ինչ վերաբերում է ՀՀ ԶՈՒ շտաբում բացթողումների մասին, ապա Կարախանյանը մանրամասներ չի կարողանում հիշել: Ասում է. «ՊՆ-ում պաշտոնանկությունների մասին էլ նախագահը չի խոսել, բայց ասել է` մտածելու, նախապատրաստվելու բան ունենք, որ թշնամու կողմից հարձակումներն անակնկալ չլինեն, կարողանանք պատշաճ հակահարված տալ»:

Հարցին, թե ՌԴ-ի հետ ՀՀ-ի հարաբերությունները վերանայելու մասին նախագահը խոսե՞լ է, Կարախանյանը պատասխանել է. «Նախագահը միշտ էլ այն կարծիքին է եղել, որ մենք իրավունք չունենք հզոր տերությունների հետ մեր հարաբերությունները վատացնենք: Եվ եթե լսել եք նախագահի ելույթները, պարզորոշ երևում է, որ հավասարը-հավասարի նման է գնում»:

Նրա խոսքով, ՌԴ-ի հետ կապված Սարգսյանը նաև ասել է. «Չպետք է թույլ տանք, որ դա վերածվի հակառուսական հիստերիայի»:

Ապրիլի 4-ին ՀՀ նախագահը հայտարարել է. «Ես ձեզ հավատացնում եմ, որ որևէ տարածք ադրբեջանցիները չեն «ազատագրել», այս պահին ամբողջ շփման գծի երկայնքով ընդամենը մի փոքրիկ հատված հարավում և մի փոքրիկ հատված հյուսիսում, որ հույս ունեմ՝ մինչև մեր շփումն ավարտենք, այլևս այդ հատվածը հյուսիսում չի լինի, ընդամենը 200-300 մետր տարածք են գրավել ադրբեջանցիները՝ տալով ամեն մետրի համար մեկից ավելի զոհ»: