ՌԴ-ն Սիրիայի հարցով այլընտրանքային նախագիծ կներկայացնի ՄԱԿ ԱԽ քննարկմանը

PanARMENIAN.Net - Ռուսաստանը Սիրիայի վերաբերյալ այլընտրանքային նախագիծ կներկայացնի ՄԱԿ Անվտանգության խորհրդի քննարկմանը: Այդ մասին հայտարարել է ՌԴ մշտական ներկայացուցչությունը ՄԱԿ-ում:

«Ֆրանսիական բանաձևի քվեարկությունից հետո կքննարկվի ռուսական այլընտրանքային փաստաթուղթը»,-ասել են դիվանագիտական ներկայացուցչության անդամները, հայտնում է ՌԻԱ Նովոստին:

Ֆրանսիական փաստաթուղթը քվեարկության կդրվի հոկտեմբերի 8-ին Մոսկվայի ժամանակով 21:30-ին: Ավելի վաղ ՄԱԿ-ում ՌԴ մշտական ներկայացուցիչ Վիտալի Չուրկինը հայտարարել էր, որ Ֆրանսիայի առաջարկը կարող է «Ռուսաստանի վետոն հրահրել»:

Ռուսական նախագծով հավանություն է տրվում Սիրիայի գծով հատուկ դեսպանորդ Ստեֆան դե Միստուրայի նախաձեռնությանը Հալեպից գրոհայիններին դուրս բերելու վերաբերյալ, ինչպես նաև կոչ է արվում պահպանել ՌԴ և ԱՄՆ սեպտեմբերի 9-ի պայմանավորվածությունները:

Փաստաթուղթը կոչ է անում անհապաղ դադարեցնել ռազմական գործողությունները Հալեպում, որի պահպանման դիտարկումը կհանձնարարվի Ժնևում գործող Սիրիայի աջակցության միջազգային խմբին:

Սիրիայի գծով ՄԱԿ հատուկ դեսպանորդ Ստեֆան դե Միստուրան հոկտեմբերի 6-ին հայտարարել էր, որ պատրաստ է անձամբ ուղեկցել «Ջեբհաթ ան Նուսրայի» խմբավորման գրոհայիններին, որոնք քաղաքի այդ մասում մոտ 900 են, եթե ցանկանան հեռանալ արևելյան Հալեպից ու Իդլիբ մեկնել:

Գրոհայինները շարունակում են գնդակոծել Հալեպի բնակելի թաղամասերը` արևելյան շրջանների բնակիչներին որպես պատանդ պահելով, չարտորնելով հումանիտար բեռների առաքումը: Առողջապահության համաշխարհային կազմակերպության տվյալներով վերջին 2 շաբաթում քաղաքում ավելի քան 300 մարդ է զոհվել, մոտ 1000-ը տուժել է:

Հալեպում ստեղծված դրության պատճառով «ՀԱԼԷՊ» հասարակական կազմակերպությունը ստացել է ավելի քան 600 խնդրագիր Հալեպում բնակվող կարիքավոր և խնդիրների առջև հայտնված սիրիահայերից` օգնելու նրանց տեղափոխվել Հայաստան՝ ձեռք բերելով Լիբանանից դեպի Հայաստան մեկ ուղղությամբ տոմս։