Հայաստանում ԱՄՆ գործերի ժամանակավոր հավատարմատար է դառնալու ԵԱՀԿ Մինսկի խմբի նախկին համանախագահ Ռուդոլֆ Պերինան: «ԱՄՆ Պետդեպարտամենտը դիմել է պաշտոնաթող դեսպան Ռուդոլֆ Պերինային Հայաստանում ԱՄՆ գործերի ժամանակավոր հավատարմատարի պաշտոնն զբաղեցնելու առաջարկությամբ: Ռուդոլֆ Պերինան կանցնի իր պարտականությունների կատարմանը հուլիսի 10-ին»,- PanARMENIAN.Net-ի թղթակցին հայտնել է ԱՄՆ դեսպանատան հասարակայնության եւ մամուլի հետ կապի պատասխանատու Թագուհի Ջահուկյանը: Նրա խոսքերով, Ռիչարդ Հոգլանդը մնում է Հայաստանում ԱՄՆ դեսպանի պաշտոնի թեկնածուն: «Մենք շարունակում ենք սպասել Սենատի կողմից նրա թեկնածության հաստատմանը»,- նշել է նա:

Հիշեցնենք, որ Ռուդոլֆ Պերինան զբաղեցրել է Լեռնային Ղարաբաղի եւ Եվրազիայի հակամարտությունների հարցով ԱՄՆ-ի հատուկ ներկայացուցչի պաշտոնը 2001-2004 թթ: