Կառավարությունը դեկտեմբերի 22-ի նիստում հաստատել է Քրեական օրենսգրքում փոփոխությունների ու լրացումների նախագիծը:

«Հարկը, տուրքը, պարտադիր այլ վճարը նվազեցնելու համար կեղծ փաստաթուղթ օգտագործելու դեպքում ասյուհետ նոր չափի պատժամիջոց կսահմանվի», - նախագիծը ներկայացնելիս ասել է ՀՀ արդարադատության նախարար Արփինե Հովհաննիսյանը, մեջբերում է Aysor.am-ը:

Նրա խոսքով` գործող օրենսդրությամբ հանցագործությունը պատժվում է սահմանված նվազագույն աշխատավարձի երկուհազարապատիկի՝ 2 մլն դրամի չափով, որը փոխարինվում է 4 մլն դրամով:

2006 թ-ից մինչև օրս՝ նշված նորմի շեմը չի վերանայվել՝ պահպանելով հանցագործության պահին սահմանված նվազագույն աշխատավարձի երկուհազարապատիկի չափը։ Մինչդեռ, 2006թ-ից առ այսօր նվազագույն աշխատավարձի շեմն աճել է մոտավորապես եռակի՝ 20 հազարից հասնելով 55 հազար դրամ, իսկ ՀՀ քրեական օրենսգրքի 205-րդ հոդվածի 3-րդ մասով նախատեսված խոշոր չափը՝ 2 մլն դրամը փոփոխության չի ենթարկվել:

Վարչապետ Կարեն Կարապետյանին հետաքրքիր էր` արդյոք այս նախագիծը ուղղված է բիզնեսի ապակրիմինալացմանը:

«Տիկին Հովհաննիսյան, կարող եմ ասել, որ սա գործարար աշխարհի կյանքը թեթևացնում է, որ մենք ասում էինք բիզնեսի ապակրիմինալացում՝ ուղղված է այդ միջոցառմանը», - հարցրել է վարչապետը:

«Միանշանակ, նախագիծը բերելու է գործարար միաջավայրի թեթևացմանը», - արձագանքել է նախարարը: