«Ելք» դաշինք. ՀՀ-ն պետք է հետ կանչի Բելառուսում իր դեսպանին

«Ելք» դաշինք. ՀՀ-ն պետք է հետ կանչի Բելառուսում իր դեսպանին

PanARMENIAN.Net - Ռուսաստանցի բլոգեր Ալեքսանդր Լապշինին Հայաստանի ռազմավարական դաշնակիցը համարվող Բելառուսի կողմից Ադրբեջանին արտահանձնելն իր քաղաքական նշանակությամբ համարժեք է Հունգարիայի կողմից Ռամիլ Սաֆարովին Ադրբեջանին արտահանձնելուն: Խորհրդարանական քառօրյայում այս մասին հայտարարել է ԱԺ պատգամավոր Նիկոլ Փաշինյանը, հայտնում է Aysor.am-ը:

Փետրվարի 7-ին Բելառուսի Գերագույն դատարանն ուժի մեջ է թողել Լապշինին Ադրբեջանին արտահանձնելու որոշումը: Նույն օրը նա տեղափոխվել է Բաքու և այժմ գտնվում է մեկուսարանում:

Նիկոլ Փաշինյանը այդ հարցով մտահոգ բոլոր քաղաքացիներին կոչ է արել փետրվարի 8-ին՝ ժամը 15-ին, հավաքվել Հայաստանում Բելառուսի դեսպանատան դիմաց` իրավիճակի վերաբերյալ կոշտ դիրքորոշում արտահայտելու համար:

«Կարծում եմ, որ Հայաստանի ԱԳՆ-ն պետք է հետ կանչի Բելառուսում Հայաստանի դեսպանին և դիվանագիտական ու քաղաքական ամենակոշտ հակազդեցության միջոցները ձեռնարկի», - հայտարարել է Նիկոլ Փաշինյանը:

Փաշինյանի կոչին հավանություն է տվել «Ելք» դաշինքը («Քաղաքացիական պայմանագիր», «Լուսավոր Հայաստան», «Հանրապետություն» կուսակցություններ)` պահանջելով սառեցնել դիվանագիտական հարաբերությունները Բելառուսի հետ:

«Ելք» դաշինքը խստորեն դատապարտում է Բելառուսի իշխանությունների՝ խոսքի ազատության իրավունքը ոտնահարող այս քայլը և այն համարում վիրավորանք հայ ժողովրդի հասցեին: Լապշինի արտահանձնումը վկայում է նաև, որ ՀԱՊԿ-ում և ԵՏՄ-ում Բելառուսի դաշնակցային կարգավիճակը Հայաստանի նկատմամբ կրում է ձևական բնույթ և չի կարող Հայաստանի արտաքին անվտանգության ապահովման գործոն լինել»,- ասվում է դաշինքի հայտարարության մեջ, որը իր ֆեյսբուքյան էջում հրապարակել է ԱԺ պատգամավոր Նիկոլ Փաշինյանը:

«Ելք» դաշինքը ՀՀ իշխանություններից պահանջում է հետ կանչել Բելառուսում ՀՀ դեսպանին և սառեցնել դիվանագիտական հարաբերությունները Բելառուսի հետ:

2016-ի դեկտեմբերին բլոգեր Ալեքսանդր Լապշինին ձերբակալել են Մինսկում Ադրբեջանի հարցումով, որտեղ նա ընդգրկված է «սև ցուցակում» ԼՂՀ այցելելու համար: ԼՂՀ այցելած անձանց համար մուտքն Ադրբեջան արգելված է: Այնուամենայնիվ, 2015-ի հունիսին Լապշինը մուտք է գործել Ադրբեջան Վրաստանի տարածքից ուկրաինական անձնագրով: Նրան հաջողվել է անցնել սահմանային հսկողությունը և հայտնվել Բաքվում, քանի որ ուկրաինական անձնագրում Ալեքսանդր անունը գրված էր «Օլեքսանդր»: Դրանից հետո Ադրբեջանը բլոգերի միջազգային հետախուզոմ էր հայտարարել «Պետական սահմանի մասին» օրենքը և երկրի միգրացիոն օրենսդրությունը խախտելու համար: ՌԴ ԱԳՆ-ն հայտարարել է, որ ՌԴ քաղաքացու արտահանձնումը երրորդ երկիր անթույլատրելի է:

 Ուշագրավ
Նա նշել է, որ ՌԴ-ն ՀՀ-ին դիտարկում է որպես դաշնակից և հարձակման ժամանակ կգործարկվեն ՀԱՊԿ-ով նախատեսված մեխանիզմները
ԱԺ աշխատակազմի ղեկավարի նախկին տեղակալ Արսեն Բաբայանիհեռախոսազանգերի արգելքի մասին հարցը հատուկ քննչական ծառայությունում չեն մեկնաբանում:
Մնացականյանը շնորհակալություն է հայտնել ԱՄՆ Ներկայացուցիչների պալատին՝ Հայոց ցեղասպանությունը ճանաչող բանաձևն ընդունելու համար