Արամ Համբարյան. ԱՄՆ Կոնգրեսում Ցեղասպանության մասին օրինագծի քվեարկության ճշգրիտ ամսաթիվը դեռեւս չի որոշվել

PanARMENIAN.Net - Մասաչուսեթս նահանգից կոնգրեսական Էդվարդ Մարկին սեպտեմբերի 11-ին կոչ է արել Ներկայացուցիչների պալատին քվեարկել Հայոց ցեղասպանության մասին 106-րդ բանաձեւի ընդունման օգտին: Այդ մասին PanARMENIAN.Net ին տված հարցազրույցում հայտարարել է Ամերիկայի Հայ Դատի հանձնախմբի (ANCA) գործադիր տնօրեն Արամ Համբարյանը: «Վաղուղ ժամանակն է, որ ԱՄՆ-ն պաշտոնապես ցեղասպանություն ճանաչի 1,5 մլն հայերի սպանությունը 20-րդ դարի սկզբին»,-հայտարարել է Մարկին:



«Մենք շարունակում ենք աջակցություն ստանալ Ներկայացուցիչների պալատի ղեկավարներից 106-րդ բանաձեւի վերաբերյալ քվեարկություն ապահովելու հարցում, սակայն քվեարկության ճշգրիտ ամսաթիվը դեռեւս անհայտ է»,-ասել է Արամ Համբարյանը:



Հիշեցնենք, որ Հայոց ցեղասպանության մասին 106-րդ բանաձեւին աջակցում են 227 կոնգրեսականներ, այն դեպքում, երբ նրա ընդունման համար հարկավոր է 218 կոնգրեսականների աջակցությունը: Հայոց ցեղասպանությունը ճանաչող 106-րդ բանաձեւը, որը պարտավորեցնում է ԱՄՆ-ի նախագահին «ցեղասպանություն» բառն օգտագործել ապրիլի 24-ի իր ամենամյա ելույթում, ԱՄՆ Ներկայացուցիչների պալատի քվեարկմանն է դրել Կալիֆորնիայից ընտրված դեմոկրատ-կոնգրեսական Ադամ Շիֆը 2007 թվականի հունվարի 30-ին: