ՌԴ դեսպանությունը պատրաստ է աջակցել Լապշինի արտահանձնմանն Ադրբեջանից

ՌԴ դեսպանությունը պատրաստ է աջակցել Լապշինի արտահանձնմանն Ադրբեջանից

PanARMENIAN.Net - Բաքվում ՌԴ դեսպանությունն անհրաժեշտ աջակցություն կցուցաբերի Ադրբեջանում 3 տարվա ազատազրկման դատապարտված ռուսաստանցի բլոգեր Ալեքսանդր Լապշինի արտահանձնմանը, եթե վերջինս դիմի նման խնդրանքով: Այդ մասին հայտարարել է դեսպանատան մամուլի քարտուղար Դենիս Ապաշկինը:

Հուլիսի 20-ին Բաքվի ծանր հանցագործությունների դատարանը դատապարտել է Ալեքսանդր Լապշինին 3 տարվա ազատազրկման: Լապշինի փաստաբան Էդուարդ Չերնինը հայտարարել էր, որ ՌԴ և Իսրայելի քաղաքացի, բլոգեր Ալեքսանդր Լապշինը կարող է արտահանձնվել ՌԴ, Իսրայել կամ Ուկրաինա, քանի որ այդ երկրների քաղաքացիություն ունի:

«Դեսպանատունը կապի մեջ է Լապշինի փաստաբանի և նրա հարազատների հետ: Իրավասու չենք մեկնաբանելու ադրբեջանական դատարանի որոշումը: Դեսպանատունը հետագայում ևս իր իրավասության շրջանակներում կմասնակցի Լապշինի իրավունքների պաշտպանությանը»,-ասել է Ապաշկինը, հայտնում է ՌԻԱ Նովոստին:

Անդրադառնալով Լապշինի հնարավոր արտահանձնմանը ՌԴ՝ դեսպանատան ներկայացուցիչը հիշեցրել է, որ ՌԴ և Ադրբեջանի միջև գործում է համապատասխան պայմանագիր:

«Եթե Լապշինը ցանկանա օգտվել այդ հնարավորությունից, որը նախատեսված է պայմանագրով, ապա դեսպանությունն անհրաժեշտ աջակցություն կցուցաբերի»,-ասել է նա:

2016-ի դեկտեմբերին բլոգեր Ալեքսանդր Լապշինին ձերբակալել են Մինսկում Ադրբեջանի հարցումով, որտեղ նա ընդգրկված է «սև ցուցակում» ԼՂՀ այցելելու համար: ԼՂՀ այցելած անձանց համար մուտքն Ադրբեջան արգելված է: Այնուամենայնիվ, 2015-ի հունիսին Լապշինը մուտք է գործել Ադրբեջան Վրաստանի տարածքից ուկրաինական անձնագրով: Նրան հաջողվել է անցնել սահմանային հսկողությունը և հայտնվել Բաքվում, քանի որ ուկրաինական անձնագրում Ալեքսանդր անունը գրված էր «Օլեքսանդր»: Դրանից հետո Ադրբեջանը բլոգերի միջազգային հետախուզոմ էր հայտարարել «Պետական սահմանի մասին» օրենքը և երկրի միգրացիոն օրենսդրությունը խախտելու համար: ՌԴ ԱԳՆ-ն հայտարարել է, որ ՌԴ քաղաքացու արտահանձնումը երրորդ երկիր անթույլատրելի է: ՌԴ-ն ու Իսրայելը դեմ էին բլոգերի արտահանձնմանը, սակայն դիվանագետների ջանքերն արդյունք չտվեցին և փետրվարի 7-ին նա արտահանձնվեց Բաքու:Ադրբեջանական դատարանն ապրիլի 7-ին 3 ամսով երկարաձգել է Բաքվի հարցումով Մինսկում ձերբակալված և Ադրբեջանին արտահանձնված ռուսաստանցի բլոգեր Ալեքսանդր Լապշինի կալանքը:

Ընթերցեք նաև. Փաստաբան. Լապշինի արտահանձնումը դեռևս անհնար է

 Ուշագրավ
Գերատեսչությունը հայտնել է նաև գերիների թիվը՝ 511 զինծառայող 7 1 քաղաքացիական
Կավելացվեն ծախսերը նաև հատուկ նշանակության նախագծերի ֆինանսավորման համար
---