BMW i8 հիբրիդային շարժիչով մեքենան արդեն Հայաստանում է

 16 սեպտեմբերի 2017 - 10:54 AMT

PanARMENIAN.Net - Սեպտեմբերի 15-ին Երևանում կայացել է BMW i8 ավտոմեքենայի պաշտոնական շնորհանդեսը:

i8-ը BMW i խմբի ավտոմեքենաների երրորդ մոդելն է: Տեխնոլոգիապես հագեցած է, միաժամանակ աշխատում է համատեղված երկու շարժիչով: Ընդհանուր 362 ձիաուժ է և այս ամենը 1485 կգ քաշի պարագայում: Այս սպորտային մեքենան հիբրիդային համակարգի շնորհիվ 100 կմ/ժ արագություն է զարգացնում 4,4 վրկ-ում: Շարժիչի առավելագույն արագությունը 250 կմ/ժ է: Հիբրիդային շարժիչից բացի i8-ն առանձնանում է նաև իր ֆուտուրիստիկ դիզայնով, թեթև քաշով ու էներգախնայող LED լուսարձակներով, իսկ ածխաթթու գազի արտանետումները մեկ կմ վազքի դեպքում կազմում են ընդամենը 49.0 գ:

Այսօր ինչպես կենցաղային տեխնիկան, այնպես էլ ավտոմեքենաները նպաստում են էներգախնայողությանը: Միավորելով վառելիքային և էլեկտրական շարժիչները զգալիորեն նվազեցվում են վառելիքի ծախսն ու կրճատում ածխաթթու գազի արտանետումները: BMW i8 սպորտային ավտոմեքենան հիբրիդային շարժիչի ու նորարարական դիզայնի խելամիտ համադրություն է: i8-ի գաղափարը ծնվել ու կյանքի է կոչվել Գերմանիայում: Այժմ մեքենան հասանելի է նաև Հայաստանում: BMW i8-ի պաշտոնական ներկայացուցիչը Հայաստանում «Եուրոմոթորս» ընկերությունն է:

2015-2016թթ. BMW i8-ը երկու տարի անընդմեջ ճանաչվել է «Տարվա շարժիչ» միջազգային մրցանակաբաշխության հաղթող:

Երևանում մեքենայի շնորհանդեսին ներկա էին «Մուլտի Գրուպ» կոնցեռնի հիմնադիր Գագիկ Ծառուկյանի որդի Նվեր Ծառուկյանը, կոնցեռնի գլխավոր տնօրեն Սեդրակ Առուստամյանը, հասարակական և քաղաքական գործիչներ, օտարերկրյա գործընկերներ, գործարարներ և լրագրողներ: