ՀՀ առողջապահության նախարարությունը 200,000 շահառուով կընդլայնի բնակչության սոցիալական կամ հատուկ խմբերի ցանկը, որում ընդգրկվածներին դեղերը հատկացվում են դրանց արժեքի լրիվ կամ մասնակի փոխհատուցմամբ։

Շրջանառության մեջ դրված նախագծով նախատեսվում է ավելացնել նոր հիվանդություն և ախտանիշ, մասնավորապես` հիպոֆիզային գաճաճություն ախտանիշը և վիրուսային հեպատիտ Ց-ի հիվանդությունը:

Նախաձեռնությամբ շահառուների ցանկում առաջարկվում է ընդգրկել նաև ընտանիքի սոցիալական գնահատման համակարգում հաշվառված 30.01-ից բարձր անապահովության միավոր ունեցող ընտանիքների անդամներին:

Ներկայումս գործող որոշման հավելված 1-ով հաստատված ցանկում ընդգրված շահառուների թվաքանակը կազմում է շուրջ 864,000: 2018 թվականին նշված շահառուներին նախատեսվել է տրամադրել 1․215 մլրդ դրամի դեղ: 2018 թվականի ընթացքում առողջապահական կազմակերպությունների կողմից շահառուներին փաստացի տրամադրվել է մոտ 300,0 հազար դեղատոմս` ընդհանուր 809․3 մլն դրամի կամ մեկ դեղատոմսի միջին արժեքը 2700 դրամ: