Հոնկոնգի օդանավակայանը կասեցրել է աշխատանքը բողոքի ակցիաների պատճառով

PanARMENIAN.Net - Հոնկոնգի օդանավակայանը 24 ժամող չեղարկել է բոլոր թռիչքները չորրորդ օրը շարունկավող բողոքի զանգվածային ակցիաների պատճառով:

«Ուղևորներին խորհուրդ է տրվում որքան հնարավոր է արագ հեռանալ օդանավակայանի տերմինալներից»,-ասել են օդանավակայանի աշխատակազմում: Ենթադրվում է, որ 24 ժամից թռիչքները կվերսկսվեն, գրում է «Վեդոմոստին»:

Ցուցարարները չորրորդ օրն անընդմեջ նստացույց են անում թռիչքների և վայրէջքների սրահում: Ինչպես հայտնում է South China Morning Post-ը, օդանավակայան տանող ճանապարհները կաթվածահար են, դեպի օդանավակայան գնացող ցուցարարների քանակը գնալով ավելանում է:

Հոնկոնգի օդանավակայանն աշխարհում ամենածանրաբեռնվածներից է, օրական մոտ 800 չվերթ է լինում:

Օգոստոսի 12-ին հարյուրավոր մարդիկ են միացել արդեն օդանավակայանում գտնվող ցուցարարներին այն բանից հետո, երբ օգոստոսի 11-ի երեկոյան ամենակոշտ բախումներն են տեղի ունեցել բողոքիների 2 ամսվա ընթացքում: Ոստիկանությունը ոչ միայն մահակներ ու արցունքաբեր գազ է կիրառել, այլ, ինչպես վկայում են սոցցանցերում տարածված տեսանյութերը, կրակել են մարդկանց գրեթե դիմահար:

Ավելի վաղ Պեկինն իր աջակցությունն է հայտնել Հոնկոնգի իշխանություններին ցուցարարների դեմ պայքարում, իսկ վերջիններս հայտարարել են, որ վճռական են լինելու: Զանգվածային ցույցերը Հոնկոնգում սկսվել են 2 ամիս առաջ, որոնց համար առիթ հանդիսացան իշխանությունների կողմից դեռևս փետրվարին ընդունված ուղղումները արտահանձնման մասին օրենքում, որով թույլատրվում է արտահանձնել հանցագործներին Չինաստանին: Շատերի կարծիքով, այդ օրենքը կարող է օգտագործվել այլախոհների դեմ պայքարում: