Զուրաբիշվիլի. Վրաստանը պետք է հստակեցնի ՀՀ-ի և Ադրբեջանի հետ սահմանը

PanARMENIAN.Net - Վրաստանին անհրաժեշտ է լուծել սահմանային բոլոր վեճերը որպես պետություն լիարժեք կայանալու համար:

Այս մասին հայտնել է Վրաստանի նախագահ Սալոմե Զուրաբիշվիլին, հաղոդրում է Նովոստի-Գրուզիան:

Նա ուշադրություն է հրավիրել Ադրբեջանի ու Հայաստանի հետ սահմանների չհամաձայնեցված հատվածներին։

Զուրաբիշվիլիի խոսքով՝ հանձնաժողովները աշխատել են այդ ուղղությամբ, հասել որոշակի փուլի, իսկ հետո գործընթացը կանգ է առել։

«Անհասկանալի է՝ ինչու չպետք է ավարտի հասցնենք այդ գործընթացը մեզ համար բարեկամական երկրների մասնակցությամբ»,- ասել է Վրաստանի նախագահը՝ հավելելով, որ տարվող գործընթացի արդյունքում ակնկալում է սահմանների որոշակիացում։

«Բանակցությունների արդյունքը կլինի սահմանը, որի շուրջ կպայմանավորվենք։ Չեմ կարող այժմ ասել՝ այն պետք է անցնի այստեղ կամ այնտեղ, սակայն դա պարտադիր փուլ է մեր պետության և ապագայի համար, այլ կարծիք չկա։ Մենք պետք է մինչև վերջ կայանանք որպես պետություն, և դրա համար նախ անհրաժեշտ է հստակեցնել մեր սահմանները, իսկ հետո նոր դրանք պաշտպանել։ Հակառակը չի կարող լինել»,- հայտարարել է Սալոմե Զուրաբիշվիլին։

Վրաստանի և Ադրբեջանի միջև սահմանը ձևավորվել է 1921 թվականին, Վրաստանի խորհրդայնացումից հետո: Հենց այդ ժամանակ բոլշևիկները Ադրբեջանին հանձնեցին այն տարածքը, որտեղ գտնվում է Դավիթ Գարեջի վանական համալիրը: Դավիթ Գարեջի վանական համալիրը համարվում է միջնադարի եզակի վանական համալիր՝ կազմված 16 եկեղեցիներից: Այդ հուշարձաններից երեքը ներկայումս Ադրբեջանի տարածքում են:

Վանական համալիրների շուրջ իրավիճակը սրվեց 2019-ի ապրիլին, երբ ադրբեջանցի սահմանապահները մի քանի օր փակեցին Ուդաբնոյի վանք տանող ճանապարհը: Դեպքը տեղի էր ունեցել Վրաստանի նախագահ Սալոմե Զուրաբիշվիլիի՝ Ադրբեջան կատարած առաջին այցից հետո: Նախագահը Բաքվում հրապարակավ հայտարարել էր երկու երկրների միջև սահմանազատման կարգը լրացնելու անհրաժեշտության մասին:

Հոկտեմբերի 7-ին Ադրբեջանը Վրաստանի հետ սահմանային գոտում ևս մեկ սահմանային հսկիչ կետ էր բացել՝«Կեշիկչի Գալա»: Սահմանային հսկիչ կետը գտնվում էԴավիթ Գարեջի վանական համալիրի տարածքում: