Նախարար. Գյուղոլորտում առկա ծրագրերի վարկավորման տոկոսները կզրոյացվեն

Նախարար. Գյուղոլորտում առկա ծրագրերի վարկավորման տոկոսները կզրոյացվեն

PanARMENIAN.Net - Գյուղատնտեսության բնագավառում գործող տարբեր ծրագրերով սահմանված վարկային բոլոր տոկոսագումարները կզրոյացվեն. Կառավարության նիստում ընդունվել է գյուղացիական տնտեսություններին (ֆիզիկան և իրավաբանական անձանց) աջակցելու նախագիծը:

«Ըստ էության՝ մի հիմնական մասով մենք զրոյացնում ենք բոլոր այն տոկոսագումարները, որոնք առ այսօր գյուղատնտեսության ոլորտում առկա տարբեր ծրագրերի դեպքում սահմանված էին»,- հայտարարել է էկոնոմիկայի նախարար Տիգրան Խաչատրյանը:

Նրա խոսքով՝ Կառավարությունը լիզինգային մնացորդային 2-4% ֆինանսավորումը զրոյացնում է: Նախարարը հիշեցրել է, որ նախկինում գյուղտանտեսական գործունեությամբ զբաղվող անհատները նաև ընդհանուր բնույթի աջակցություն էին ստանում գործադիրից՝ առանց տարանջատելու, թե ինչ առանձնահատկություն պետք է ունենա գործունեությունը (նախկինում 12 տոկոսից 7 տոկոսային կետն այդ ծրագրի համար վճարում էր պետությունը, 5%-ը՝ գյուղացին), սակայն այժմ զրոյացվում է գյուղացիական տնտեսության կողմից վճարվող 5 տոկոսը:

«Մինչ այսօր կառավարությունը ֆինանսապես աջակցում էր գյուղատնտեսական ծրագրերի իրականացմանը, եթե առևտրային բանկը համաձայն էր այդ դրամային ֆինանսավորումը տրամադրել մինչև 12% առավելագույն տոկոսադրույքով, այս փուլում հայտարարում ենք, որ պատրաստ ենք այդ տոկոսները սուբսիդավորել նաև այն դեպքում, երբ առևտրային բանկերը որոշեն միջոցները հատկացնել մինչև 14 տոկոս առավելագույն դրամային տոկոսադրույքով: Սուբսիդավորվելու են նաև այն տոկոսները, որոնք տնտեսվարողները կհամաձայնեն վերցնել արտարժույթով»,- ասել է Խաչատրյանը:

Նախարարը նշել է, որ ըստ որոշման՝ եթե առևտրային բանկերը վարկեր տրամադրեն մինչև 1 մլն դրամ գումարով, 13%-ով և 2 տարի ժամկետով, ապա Կառավարությունը կսուբսիդավորի բոլոր տոկոսագումարները: Նրա խոսքով՝ ստացվում է, որ, անկախ գոծունեության ոլորտից, գյուղացիական տնտեսությունները 1 մլն դրամի չափով վարկավորման դեպքում ունենալու են 0 տոկոս վարկային ռեսուրսներ:

Նախարարը նշել է նաև, որ եթե գյուղացիական տնտեսությունները կորոշեն համատեղել իրենց ջանքերը և միասնական ծրագրեր իրականացնել ու հանդես գալ կոոպերատիվի տեսքով, ապա կառավարությունը ոչ միայն կսուբսիդավորի, այլև կհամաֆինանսավորի այդ ծրագրերը:

Վարչապետ Փաշինյանը հանձնարարել է մշակված աջակցության ծրագրի մասին հնարավոր բոլոր տարբերակներով տեղյակ պահել պոտենցիալ շահառուներին՝ հավելելով, որ սա պատմական հնարավորություն է գյուղատնտեսության ոլորտում որակական փոփոխություն ունենալու համար:

ՀՀ-ում մարտի 16-ից մինչև ապրիլի 14-ն արտակարգ դրություն է՝ կորոնավիրուսի տարածումը կանխելու համար: Մարտի 25-ից երկրում 7 օրով գործում է քաղաքացիների տեղաշարժի սահմանափակում: Հայաստանում մարտի 26-ի առավոտվա դրությամբ կորոնավիրուսով վարակի դեպքերի թիվը հասել է 290-ի` նախորդ օրվա համեմատ ավելանալով 25-ով: Ապաքինվել է 18 անձ, փաստացի բուժվում է 272-ը։

Առողջապահության նախարարությունում գործում է շուրջօրյա «թեժ գիծ» ծառայություն 8003 և «օպերատիվ զանգերի կենտրոն» 060838300 հեռախոսահամարներով:

Ընթերցեք նաև․ Կորոնավիրուսից խուսափելու համար խորհուրդներ` ԱՀԿ-ից

 Ուշագրավ
ՌԴ-ում սահմանափակումների ռեժիմը չի ազդելու ՀՀ-ի վրա
Շուկայի վերահսկողության տեսչական մարմինն ուսումնասիրում է ալկոգելի շուկան՝ խախտումների մասին ահազանգերի հիմքով
Փաշինյանն ասել է, որ կորոնավիրուսից հետո ավելի ուժեղացած դուրս կգան այն երկրները, որոնք կհասցնեն ռազմավարական բնույթի որոշումներ կայացնել
«Պատրաստ ենք անբարենպաստ զարգացման դեպքում «հանգստացնել» ֆինանսական շուկան»,- ասել է նա