Եղեգնուտցիները գործադիրից Արմավիրի մարզպետի հրաժարականն են պահանջել

PanARMENIAN.Net - Արմավիրի Եղեգնուտ համայնքի մի խումբ բնակիչներ Կառավարության շենքի առջև բողոքի ցույց են իրականացրել՝ հայտարարելով, որ մարզպետ Համբարձում Մաթևոսյանն ամեն ինչ անում է, որ վերադառնա նախկին գյուղապետը: Նրանք պահանջել են մարզպետի հրաժարականն ու վարչապետ Նիկոլ Փաշինյանի հետ հանդիպելու ցակություն հայտնել, փոխանցում է Factor.am-ը:

Համայնքի ղեկավարի տեղակալ Անտոն Խուրշուդյանը հայտարարել է, թե մարզպետը հրաժարվում է երկխոսել իրենց հետ: Ըստ նրա՝ 170 մլն դրամի ասֆալտապատման ծրագիր է իրականացվում, սակայն դրան խոչընդոտում է մարզպետը, քանի որ նախկին համայնքապետն իշխանության չէ:

Ըստ Խուրշուդյանի՝ Մաթևոսյանը մի շարք ապօրինի կարգադրություններ է արել, իսկ իրեն ոստիկանությունում զրույցի են հրավիրել ու պահանջել հանձնել գյուղապետարանի կնիքը:

Արմավիրի մարզի Եղեգնուտ համայնքում դեռ 2018-ից համայնքապետի պաշտոնի շուրջ կրքեր են բորբոքվում: 2018-ի իշխանափոխությունից հետո Եղեգնուտը 27 տարի ղեկավարած Ռազմիկ Մարգարյանը բնակիչների ճնշմամբ լիազորությունները վաղաժամ դադարեցնելու դիմում էր ներկայացրել:

Սակայն համայնքի նախկին ղեկավարը մտափոխվել է, մարզպետի որոշումը բողոքարկել ՀՀ վարչական դատարան, որն էլ բավարարել է բողոքը։

Արդյունքում մարզպետի որոշումն անվավեր է ճանաչվել, ըստ այդմ՝ գյուղապետի ԺՊ Ռազմիկ Մկրտչյանը պետք է հեռանա պաշտոնից, նախկին ղեկավար Ռազմիկ Մարգարյանը՝ շարունակի պաշտոնավարել։ Դրանից հետո Արմավիրի ներկայիս մարզպետի` Համբարձում Մաթևոսյանի` 2020-ի հունիսի 22-ի որոշմամբ ևս անվավեր է ճանաչվել Մկրտչյանին համայնքի ղեկավարի ԺՊ նշանակելու որոշումը:

Մաթևոսյանն աշխատանքային խումբ է ստեղծել, որի գործունեությանը համայնքի բնակիչները խոչընդոտել են, նրանց դեմ քրգործ է հարուցվել ինքնիրավչության հոդվածով: