Վահրամ Բաղդասարյան․ Սարգսյանը ասել է՝ պետք է ամեն ինչ անի, որ ցնցումներից խուսափի

PanARMENIAN.Net - ԱԺ նախկին պատգամավոր, ՀՀԿ-ական Վահրամ Բաղդասարյանը, մանրամասներ ներկայացելով իր և ՀՀ նախագահի հանդիպումից, նշել է, որ Արմեն Սարգսյանը ասել է՝ պետք է ամեն ինչ անի, որ ցնցումներից խուսափի։

Նա հավելել է, որ Արմեն Սարգսյանը խոստացել է, որ մինչև օրենքով սահմանված օրվա վերջ կմտածի և իր որոշման մասին տեղյակ կպահի։ Նրա խոսքով՝ նախագահը չի ասել, որ ՍԴ դիմում չի ուղարկելու, պարզապես բաներ ունի ճշտելու։

«Ասել է՝ «ես պետք է բոլոր կողմերի հետ խոսեմ», դրա համար ունի ժամանակ», - նշել է Բաղդասարյանը, գրում է Aysor.am-ը։

Հարցին՝ ինչպե՞ս է գնահատում նախագահի գործողությունները, Վահրամ Բաղդասարյանը պատասխանել է, որ գնահատականներ կտա օրենքով սահմանված ժամի ավարտից հետո։ «Համբերատար սպասում ենք», - ասել է նախկին պատգամավորը։

Այն դիտարկմանը, թե իրենք են Արմեն Սարգսյանին ընտրել նախագահ, նախկին պատգամավորն արձագանքել է. «Մենք չենք ընտրել, որպեսզի լինի անգործունյա, մենք ընտրել ենք, որ աշխատի»։

Ավելի վաղ Գլխավոր շտաբը հանդես էր եկել հայտարարությամբ՝ պահանջելով վարչապետ Նիկոլ Փաշինյանի և նրա կառավարության հրաժարականը։ Դրան հաջորդեց Փաշինյանի հայտարարությունը, թե ԳՇ պետ Օնիկ Գասպարյանին աշխատանքից ազատելու որոշում է կայացրել և ուղարկել նախագահ Արմեն Սարգսյանին։ Վերջինս առարկություններով վերադարձրեց ազատման հրամանագրի նախագիծը, իսկ վարչապետն այն կրկին ուղարկեց նախագահին:

Արդյունքում Սարգսյանը կրկին չստորագրեց հրամանագիրը, ինչը, նշանակում է, որ այն ուժի մեջ կմտնի ավտոմատ: Միաժամանակ նախագահն առանձին դիմումով դիմեց ՍԴ` «Զինվորական ծառայության և զինծառայողի կարգավիճակի մասին» 2017թ. նոյեմբերի 15-ի ՀՀ օրենքի՝ Սահմանադրությանը համապատասխանելու հարցը որոշելու խնդրանքով: