Պուտինն ու Էրդողանն իրենց տեսակետներն են հայտնել ՌԴ կողմից ԴԺՀ և ԼԺՀ ճանաչման վերաբերյալ

PanARMENIAN.Net - ՌԴ նախագահ Վլադիմիր Պուտինը և Թուրքիայի նախագահ Ռեջեփ Թայիփ Էրդողանը փետրվարի 23-ին տեղի ունեցած հեռախոսազրույցում իրենց գնահատականներն են ներկայացրել ՌԴ կողմից ԴԺՀ և ԼԺՀ անկախության ճանաչման վերաբերյալ։ Էրդողանը ներկայացրել է իր հայտնի դիրքորոշումն այդ հարցի շուրջ, հայտնում է Կրեմլի մամուլի ծառայությունը։

Էրդողանը հայտարարել էր, որ ՌԴ կողմից ԴԺՀ և ԼԺՀ անկախության ճանաչումն անընդունելի է։

Պուտինն ընդգծել է կայացված որոշման օբեյկտիվ անհրաժեշտությունը՝ Դոնբասում ուկրաինական իշխանությունների ագրեսիայի և Մինսկի համաձայնությունների կատարումից կտրականապես հրաժարվելու պայմաններում։

Թուրքիայի նախագահականի հանրային կապերի վարչության հաղորդմամբ՝ Էրդողանը շեշտել է, որ միշտ մեծ կարևորություն է տվել տարածաշրջանային խնդիրների հարցով Պուտինի հետ հիմնած սերտ երկխոսությանը՝ ավելացնելով, որ տեսել են դրա դրական արդյունքներն, և ինքը վճռական է այդ մոտեցումը շարունակելու հարցում:

Էրդողանը շեշտել է, սակայն, որ իրենք չեն ճանաչում Ուկրաինայի ինքնիշխանությանն ու տարածքային ամբողջականությանը հակասող քայլերը, և դա իրենց համար սկզբունքային մոտեցում է: Թուրքիայի նախագահը կարևորել է նաև Մինսկի համաձայնագրերի հիման վրա արդյունքի հասնելու կարևորությունը, գրում է Ermenihaber-ը։

Էրդողանը համոզմունք է հայտնել, որ խնդրի սրացումը և բախումները ոչ ոքի օգուտ չեն բերի՝ ավելացնելով, որ իրենք կարևորում են դիվանագիտական շփումների ու բանակցությունների շարունակումը: Նա հերթական անգամ ասել է, որ լարվածության թուլացման և խաղաղության պահպանման համար իրենք պատրաստ են անել այն ամենը, ինչը կախված կլինի իրենցից:

Թուրքիայի նախագահը, նշելով, որ իրենք այս խնդիրը դիվանագիտական ճանապարհով լուծելու կոչ են անում, ընդգծել է, որ Թուրքիան ՆԱՏՕ-ի ներսում էլ կառուցողական դիրքորոշում է որդեգրել:

Ըստ Կրեմլի հաղորդագրության, կողմերն անդրադարձել են նաև ՌԴ համար անվտանգության իրավաբանական երկարաժամկետ երաշխիքների մշակման թեմային։ Այս համատեքստում Պուտինը հիասթափություն է հայտնել ԱՄՆ և ՆԱՏՕ-ի արձագանքի վերաբերյալ, որոնք փորձում են անտեսել ՌԴ մտահոգություններն ու պահանջները։

Կողմերը նաև պայմանավորվել են շարունակել ռուս-թուրքական շփումները տարբեր ձևաչափերով։