Լարված իրավիճակ ՔԿ վարչության մոտ․ Զոհվածների ծնողները փորձում են ներս մտնել

PanARMENIAN.Net - Լարված իրավիճակ է ստեղծվել Քննչական կմիտեի զինվորական քննչական գլխավոր վարչության շենքի մոտ։ 44–օրյա պատերազմում զոհվածների ծնողները ՔԿ հատկապես կարևոր գործերի քննության վարչության պետ Ռաֆայել Վարդանյանից պահանջում են անհապաղ ազատ արձակել Արցախյան 44-օրյա պատերազմում զոհված Մխիթար Գալեյանի հորը՝ Գարիկ Գալեյանին, տեղեկացնում է Sputnik Արմենիան։

Վարդանյանը հայտարարել է, որ քրեական գործ է հարուցվել, և հնարավոր չէ այս պահին ազատ արձակել Գարիկ Գալեյանին, քանի որ կա հատուկ ընթացակարգ։

Քաշքշուկ է սկսվել ծնողների և իրավապահների միջև։ Ծնողները փորձում են ՔԿ զինվորական քննչական գլխավոր վարչության շենք մտնել, սակայն իրավապահները դիմադրում են։

ՔԿ զինվորական քննչական գլխավոր վարչության շենքից մեկ այլ պաշտոնատար անձ իջել է ծնողների մոտ և նշել, որ հիմա կքննարկեն նրանց պահանջն ու հայտարարությամբ հանդես կգան։

Ինչպես ավելի վաղ հայտնել էր ՔԿ-ն, Գալեյանին մեղադրանք է առաջադրվել։

Ըստ ՔԿ հաղորդագրության՝ մայիսի 17-ին՝ ժամը 14:05-ի սահմաններում, մի խումբ անձինք սահմանված կարգի խախտմամբ մուտք են գործել ՀՀ ՊՆ N զորամասի տարածք։ Նրանք չեն ենթարկվել զորամասի տարածքը լքելու՝ զորամասի հրամանատարի սպառազինության գծով տեղակալ, գնդապետի օրինական պահանջին, հայհոյել են, քաշքշել և բռնություն գործադրել նրա նկատմամբ՝ պլաստմասե շշով հարվածելով դեմքին: Իրավապահները պարզել են իշխանության ներկայացուցչի նկատմամբ առերևույթ բռնություն գործադրած և ծանր վիրավորանք հասցրած անձանցից երեքի ինքնությունը։ Ըստ ՔԿ-ի՝ նրանք Մխիթար Գալեյանի հայրն ու հորեղբայրն են՝ Գարիկ և Արթուր Գալեյանները, ինչպես նաև քաղաքացի Ազգուշ Մարտիրոսյանը:

Գարիկ Գալեյանը ձերբակալվել է։ Նրան մեղադրանք է առաջադրվել՝ ՀՀ քրեական օրենսգրքի 327.6-րդ հոդվածի (Զորամաս կամ հատուկ պահպանվող զինվորական այլ տարածք ապօրինի մուտք գործելը) 3-րդ մասի 1-ին կետով, 137.1-րդ հոդվածի (Ծանր վիրավորանք հասցնելը) 1-ին մասով և 316-րդ հոդվածի (Իշխանության ներկայացուցչի նկատմամբ բռնություն գործադրելը) 1-ին մասով:

Ավելի ուշ 44-օրյա պատերազմում զոհված Մխիթար Գալեյանի հորը՝ Գարիկ Գալեյանին տեղափոխել են «Աստղիկ» բժշկական կենտորն։ Այդ մասին հայտնել է նրա փաստաբան Վահան Հովհաննիսյանը, տեղեկացնում է Aysor.am-ը։

Նա հայտնել է նաև, որ Գալեյանն օրեր առաջ է ենթարկվել սրտի վիրահատության։ «Հինգ ստենտ է դրված, հիմա տեղափոխում են հիվանդանոց», - ասել է նա։

Փաստաբանի փոխանցմամբ՝ Գալեյանը ի վիճակի չի եղել խոսել. շատ վատ վիճակում է եղել։

Վարույթն իրականացնող մարմինը նաև Արթուր Գալեյանին ձերբակալելու որոշում է կայացրել։ Որոշումն ուղարկվել է հետաքննության մարմնին: Ձեռնարկվում են անհրաժեշտ միջոցներ՝ նրան հայտնաբերելու և նախաքննական մարմնին ներկայացնելու ուղղությամբ: