Միրզոյան․ Ադրբեջանը միտված է տապալելու խաղաղության գործընթացը

PanARMENIAN.Net - ՀՀ ԱԳ նախարար Արարատ Միրզոյանը, մեկնաբանելով օգոստոսի 31-ի բրյուսելյան հանդիպման վերաբերյալ որոշ շահարկումները, հայտարարել, է, որ բանակցությունների շարունակական կամայական, իրականությանը չհամապատասխանող մեկնաբանությունները և պայմանավորվածությունների կատարումից խուսափելը թույլ են տալիս մտածելու, որ Ադրբեջանը միտված է տապալելու խաղաղության գործընթացը և ուժի կիրառման միջոցով շարունակելու էթնիկ զտումների իր քաղաքականությունը:

«Հայկական կողմի տեսակետն Ադրբեջանի կողմից առաջարկված հինգ կետերի վերաբերյալ անփոփոխ է: Ինչպես ասել ենք նախկինում, 2022թ. մարտի 10-ին Ադրբեջանի կողմից փոխանցված առաջարկներում մեզ համար անընդունելի ոչինչ չկա: Այլ բան, որ այդ առաջարկները չեն հասցեագրում Հայաստան-Ադրբեջան համապարփակ խաղաղության օրակարգի բոլոր հարցերը: ԵԱՀԿ Մինսկի խմբի համանախագահ երկրներին փոխանցած մեր պատասխանով մենք լրացրել ենք օրակարգը և հետևաբար՝ այդ հենքի վրա պատրաստ ենք խաղաղության բանակցությունների շարունակությանը:

Սա ևս մեկ անգամ վերահաստատվել է վարչապետ Փաշինյանի կողմից Բրյուսելում տեղի ունեցած վերջին քննարկումների ընթացքում:

Այս տեսակետը չլսելը կամ չլսելու փորձերը հայկական կողմին հիմք են տալիս կասկածելու Ադրբեջանի՝ խաղաղության հասնելու մտադրության անկեղծության մեջ»,-ասվում է ՀՀ ԱԳ նախարարի մեկնաբանության մեջ։

Ադրբեջանի նախագահ Իլհամ Ալիևը Իտալիայում հայտարարել է, որ Բրյուսելում Հայաստանը ևս մեկ անգամ հաստատել է, որ ընդունում է Բաքվի առաջարկած 5 կետը և որ երկու երկրների ԱԳ նախարարները խաղաղաության համաձայնգրի վտեքստի շուրջ բանակցությունները վարելու են հենց այդ կետերի հիման վրա։ ‌