Վարչապետ Նիկոլ Փաշինյանն ԱԺ–ում, ներկայացնելով կառավարության ծրագրի 2022-ի կատարողականը, հայտարարել է, որ 44-օրյա պատերազմից հետո Ադրբեջանն էյֆորիայի մեջ է և մտածում է վերցնել հնարավորինս շատ բան, իսկ եթե հնարավոր է՝ վերցնել ամեն ինչ. սա ավելի է բորբոքվում միջազգային իրադրությամբ։

«Ըստ էության, Ադրբեջանը դառնում կամ դարձել է էներգետիկ և լոգիստիկ խաչմերուկ և նրա կարևորությունը թե ՌԴ–ի, թե որոշ արևմտյան երկրների համար մեծացել է։ Այս իրավիճակը թե ռիսկեր, թե հնարավորություններ ունի։ Ռիսկերը տեսնում ենք գրեթե ամեն օր, իսկ հնարավորությունն այն է, որ Հարավային Կովկասը մի մեծ խաչմերուկ է, որտեղ կարևոր է ինչպես Հայաստանի, այնպես էլ Վրաստանի դերը։ Այս համատեքստում տարածաշրջանի կայունությունը կարող է կոնսենսուս դառնալ ՌԴ–ի և Արևմուտքի միջև»,–ասել է Փաշինյանը, հայտնում է Sputnik Արմենիան։

Նրա խոսքով` եթե տարածաշրջանը նորից պայթի, առնվազն էներգետիկ առումով այն կարող է պրոբլեմ դառնալ ՌԴ–ի և Արևմուտքի համար։

Փաշինյանը նշել է, որ իր անկեղծ մղումն է` ամեն հնարավորն անել Ադրբեջանի հետ հնարավորինս շուտ խաղաղության պայմանագիր կնքելու համար։ Նա նշել է, որ հնարավոր է նման զարգացում, սակայն դրա համար պետք է առերեսվել մի շարք խնդիրների հետ։

«Հայաստանի և Ադրբեջանի միջև խաղաղության պայմանագիրը իրատեսական կդառնա, եթե երկու երկրները միմյանց տարածքային ամբողջականությունը ճանաչեն և պարտավորվեն երբևէ միմյանց տարածքային պահանջներ չներկայացնել։ Իրականում այս մասին Ադրբեջանի նախագահի հետ պայմանավորվել ենք Պրահայում և Սոչիում։ Ուզում եմ վերահաստատել, որ ՀՀ-ն լիարժեք ճանաչում է Ադրբեջանի տարածքային ամբողջականությունը և ակնկալում ենք, որ Ադրբեջանը նույնը կանի` Հայկական ԽՍՀ ամբողջ տարածքը ճանաչելով որպես Հայաստանի Հանրապետություն»,–ասել է Փաշինյանը։

Նա շեշտել է, թե հայկական կողմն է առաջարկել, որ խաղաղության պայմանագրին կցվեն Հայկական և Ադրբեջանական ԽՍՀ–ների, ԽՍՀՄ կողմից պատրաստված քարտեզները որպես երկու երկրների տարածքային ամբողջականության հիմք։ Սակայն այստեղ է, որ ամենաբարդ խնդրին են հասնում ԼՂ–ին։

Նա նշել է, որ ԼՂ հակամարտության ամբողջ ընթացքում ինքնորոշման ու տարածքային ամբողջականության սկզբունքները դրվել են կողք-կողքի: Փաշինայնը հավելել է, որ եթե ինքնորոշման հարց ես բարձրացնում, ուրեմն ինչ որ մի բանի մաս ես, և այս իրողությունը «ոչ միայն ստեղծել ենք, այլև ցեմենտել»: Նա հավելել է, որ սրանով, ըստ նրա, խաբել ենք ինքներս մեզ և ԼՂ ժողովրդին:

Փաշինյանը նշել է, որ շատ կարևոր է` խաղաղության պայմանագիրը երաշխավորող միջազգային մեխանիզմներ ձևավորվեն, հակառակ դեպքում՝ պայմանագրի ստորագրման հաջորդ օրը կարող է նոր պատերազմ բռնկվել կամ նոր էսկալացիա տեղի ունենալ:

Ապրիլի 12-ին վարչապետ Նիկոլ Փաշինյանը, ԱԺ-ում պատասխանելով այն հարցին, թե երբ հայկական կողմն ասում է, որ Ադրբեջանից տարածքային պահանջներ չունի, դա ընկալվում է որպես հրաժարում ԼՂ–ից, հայտարարել է, որ «հայկական կողմի հանճարեղ դիվանագիտության արդյունքում» Մադրիդյան սկզբունքներով է Հայաստանը ԼՂ–ն ճանաչել Ադրբեջանի մաս։ Ըստ նրա, ինքնորոշվել նշանակում է լինել որևէ տեղ և տեղափոխվել մեկ այլ տեղ՝ Մադրիդյան սկզբունքներից հետո այն տեղը, որտեղից ԼՂ-ն պետք է ինքնորոշվեր, դարձել է Ադրբեջանը, իսկ մինչ այդ ԽՍՀՄ-ն էր։