ՌԴ ԱԳ փոխնախարար Անդրեյ Ռուդենկոն Մոսկվայում հանդիպում է ունեցել Ադրբեջանի դեսպան Փոլադ Բյուլբյուլօղլիի հետ, որի ժամանակ ռուսական կողմը հաստատել է Լաչինի միջանցքի անհապաղ և ամբողջական ապաշրջափակման, երկկողմանի տրանսպորտային երթևեկության վերականգնման անհրաժեշտությունը ըստ նոյեմբերի 9-ի հայտարարության, ինչպես նաև Լեռնային Ղարաբաղի նորմալ կենսպահովոման համար պայմանների ստեղծումը։ Այդ մասին ասվում է ՌԴ ԱԳՆ հայտարարության մեջ։

«Ադրբեջանի ԱԳՆ ոչ կոռեկտ մեկնաբանությունների կապակցությամբ ընդգծվել է, որ ՌԴ-ն միշտ հարգանքով է վերաբերվել Ադրբեջանի տարածքային ամբողջականությանը, սակայն դա չի չեղարկում հայ-ադրբեջանական կարգավորման օրակարգի բոլոր հարցերի լուծումը, ներառյալ՝ Լեռնային Ղարաբաղի բնակչության իրավունքների և անվտանգության ապահովումը բացառապես խաղաղ քաղաքական և դիվանագիտական մեթոդներով»,-ասվում է ՌԴ ԱԳՆ հայտարարության մեջ։

Նշվում է նաև, որ ՌԴ-ն վերահաստատել է իր պատրաստակամությունը առաջիկայում ԱԳ նախարարների եռակողմ հանդիպում կազմակերպել Մոսկվայում՝ քննարկելու համար բարձր մակարդակով ձեռք բերված պայմանավորվածությունների կատարումը, այդ թվում խաղաղության պայմանագրի քննարկումը, հետագայում Մոսկվայում ՌԴ, Ադրբեջանի և ՀՀ ղեկավարների գագաթնաժողովում վերոհիշյալ փաստաթուղթը ստորագրելու մտադրությամբ։

Ավելի վաղ Ադրբեջանի ԱԳՆ-ն հայտարարել էր, թե ՌԴ ԱԳՆ հուլիսի 15-ի հայտարարությունը Լեռնային Ղարաբաղում տիրող իրավիճակի մասին չի համապատասխանում դաշնակցային փոխգործակցության երկկողմ հռչակագրին։

«Մտահոգիչ է այն հանգամանքը, որ այսօր իրավիճակը Լեռնային Ղարաբաղի շուրջ զարգանում է բացասական սցենարով։ Խորանում է հումանիտար ճգնաժամը տվյալ տարածքում։ Տեղի բնակչությունը սննդի, դեղորայքի, առաջին անհրաժեշտության իրերի սուր պակաս է զգում, գործնականում զրկված է էլեկտրաէներգիայի և գազի մատակարարումից։ Դա կարող է ամենադրամատիկ հետևանքներ ունենալ Ղարաբաղի հայերի՝ տարածաշրջանի հասարակ բնակիչների համար»,– նշված է հայտարարության մեջ։