Վիճաբանություն դրոնի պատճառով. 10 հոգով ծեծել են երկուսին, հնչել են կրակոցներ![]() 15 նոյեմբերի 2023 - 17:00 AMT PanARMENIAN.Net - Նոյեմբերի 12-ին հաղորդումներ են ստացվել Աղավնավանքում գործող գինետան մոտ մի խումբ անձանց միջև վիճաբանության մասին, որի ընթացքում դրա մասնակից 2 անձ ծեծի է ենթարկվել, հնչել են կրակոցներ, ինչպես նաև վնասվել են ավտոմեքենաներ: Դեպքի առթիվ ՀՀ քննչական կոմիտեի Տավուշի մարզային քննչական վարչության Դիլիջանի քննչական բաժնում նախաձեռնվել է քրեական վարույթ ՔՕ 195-րդ հոդվածի 2-րդ մասի 5-րդ կետի (2 դրվագ), 297-րդ հոդվածի 3-րդ մասի, 264-րդ հոդվածի 2-րդ մասի 1-ին կետի, 335-րդ հոդվածի 1-ին մասի հատկանիշներով: Ձևավորվել է քննչական խումբ, սկսված նախաքննության շրջանակում իրականացվել են անհետաձգելի քննչական, վարութային գործողություններ, ինչպես նաև օպերատիվ-հետախուզական միջոցառումներ։ Աղավնավանքում հաստատված 24-ամյա մի երիտասարդ ու նույն գյուղի 51-ամյա մի բնակիչ ճանաչվել են տուժող: Կատարվել է դեպքի վայրի զննություն, որի արդյունքում հայտնաբերվել են արնանման հետքեր, պարկուճներ, շուրջ մեկ տասնյակի հասնող վնասված՝ տարբեր մակնիշների ավոտմեքենաներ, որոնք տեղափոխվել են հատուկ պահպանվող տարածք: Առգրավվել է գինետան տեսախցիկների հիշասարքը, նշանակվել են մի շարք փորձաքննություններ: Քննությամբ նախնական փաստական տվյալներ են ձեռք բերվել այն մասին, որ դեպքից մի քանի օր առաջ անօդաչու թռչող սարք (դրոն) գործարկելու հետ կապված վիճաբանություն է տեղի ունեցել մեկ անձի և 24-ամյա երիտասարդի միջև, որի ժամանակ վերջինս դեմքին ստացել է հարվածներ: Այդ ամենի մասին երիտասարդը պատմել է 51-ամյա համագյուղացուն: Նոյեմբերի 12-ին` ժամը 18:00-19:00-ի սահմաններում, նախօրոք գյուղ ժամանած իր ընկերների հետ նույն անձը հանդիպել է 24-ամյա Ա.Մ-ին, նրա 51-ամյա համագյուղացուն ու վերջինիս եղբորը, ապա մոտ 10 հոգով ծեծի ենթարկել նրանց: Այդ ընթացքում նաև հնչել են կրակոցներ։ Վերը նշված հանցագործությունը կատարած լինելու անմիջականորեն ծագած կասկածի հիման վրա նոյեմբերի 13-ին ձերբակալվել են միջադեպի մասնակից, մայրաքաղաքի, հանրապետության մի քանի մարզերի տարբեր համայնքերի 7 բնակիչ: Ձեռք բերված փաստերի հիման վրա վերջիններիս ներկայացվել են մեղադրանքներ։ Հանրային քրեական հետապնդում է հարուցվել ևս 2 անձի նկատմամբ և որոշում է կայացվել դատարան ներկայացնելու համար նրանց ձերբակալելու վերաբերյալ։ Ոստիկանությանը տրվել է նշված 2 անձանց գտնելու և վարույթն իրականացնող մարմինին ներկայացնելու հանձնարարություն։ Նախաքննությունը շարունակվում է։ Ձեռնարկվում են բոլոր անհրաժեշտ միջոցները՝ միջադեպի մասնակիցների շրջանակն ամբողջականացնելու, նրանց արարքներին իրավական գնահատական տալու համար։ ![]() ![]() Սոչի-Երևան չվերթի ինքնաթիռն ուղևորվել է Թբիլիսիի օդանավակայան Ավինյանը հանձնարարել է նիստից հետո քննարկում անցկացնել և իրեն զեկուցել Գումարը կհատկացվի պահուստային ֆոնդից Համառոտագիրն անդրադառնում է առցանց տիրույթի կարգավորման բարեփոխումների դերին և կարևորությանը ![]() ![]() ![]() | ![]() ![]() ![]() ![]() ![]() ![]() ![]() ![]() |