27 դեկտեմբերի 2023 - 17:11 AMT
ԿԽՄԿ-ն դեկտեմբերին տեսակցել է Ադրբեջանում պահվող բոլոր հայերին

ԿԽՄԿ ներկայացուցիչները դեկտեմբեր ամսին հերթական անգամ տեսակցել են Ադրբեջանում պահվող բոլոր հայերին։ Այդ մասին ասել է ԿԽՄԿ հայաստանյան գրասենյակի հաղորդակցության ծրագրերի պատասխանատու Զառա Ամատունին, հայտնում է «Փաստինֆոն»։

«Տեսակցությունների շրջանակում, համաձայն մեր ընթացակարգերի, առանձնազրույցներ են տեղի ունեցել, հնարավորություն է տրվել կապ հաստատել հարազատների հետ և այս անգամ Ադրբեջանի իշխանությունների համաձայնությամբ՝ փոխանցվել են ընտանիքների կողմից յուրաքանչյուր անձին փաթեթներ։ Փաթեթներն այն հնարավորությունն է, որը ժամանակ առ ժամանակ տրվում է ընտանիքներին, որ նրանք անձնական իրեր փոխանցեն իրենց հարազատներին»,- նշել է Ամատունին։

ՀՀ ԱԳՆ–ն խստորեն դատապարտել է Ադրբեջանի կողմից Լեռնային Ղարաբաղի առաջնորդների՝ Արկադի Ղուկասյանի, Բակո Սահակյանի, Արայիկ Հարությունյանի, ԱԺ նախագահ Դավիթ Իշխանյանի, նախկին պետնախարար Ռուբեն Վարդանյանի և այլոց ձերբակալությունները։ Ադրբեջանի կողմից ձերբակալվածների թվում են նաև ՊԲ հրամանատար Լևոն Մնացականյանը, փոխհրամանատար Դավիթ Մանուկյանը և ԱԳ նախկին նախարար Դավիթ Բաբայանը։ ԱԳՆ–ն հայտարարել է, որ ՀՀ–ն կձեռնարկի բոլոր հնարավոր քայլերն ապօրինաբար ձերբակալված ԼՂ ներկայացուցիչների իրավունքները միջազգային, այդ թվում՝ դատական ատյաններում պաշտպանելու համար։