Բողոքի ակցիաների ընթացքում Երևանում բերման ենթարկված բոլոր քաղաքացիներն ազատ են արձակվել։ Այդ մասին հայտնել է ՆԳՆ խոսնակ Նարեկ Սարգսյանը, տեղեկացնում է Factor.am-ը։

Վերջին տվյալներով, ոստիկանության բաժիններ բերման էր ենթարկվել 151 քաղաքացի։

ՆԳՆ-ից հայտնել էին, որ քաղաքացիները բերման են ենթարկվել ոստիկանության օրինական պահանջը չկատարելու հիմքով։

Մայիսի 13–ի վաղ առավոտից մայրաքաղաքում ու մարզերում անհնազանդության ակցիաներ էին իրականցվում։ Այս գործողությունների մասին մայիսի 12–ի հանրահավաքում հայտարարել էր Տավուշի թեմի առաջնորդ Բագրատ արքեպիսկոպոս Գալստանյանը։

«Տավուշը հանուն հայրենիքի» շարժումը, որը դեմ է հանդես գալիս Տավուշում մեկնարկած հատվածական սահմանազատմանը, և որի երթը դեպի Երևան առաջնորդում էր ՀԱԵ Տավուշի թեմի առաջնորդ Բագրատ սրբազանը մայիսի 9-ին հասել է մայրաքաղաք, որտեղ բազմահազարանոց հանրահավաք է անցկացրել Հանրապետության հրապարակում։

Բագրատ սրբազանը, ընդդիմադիր պատգամավորների հետ խորհրդակցելուց հետո, դիմելով հանրահավաքի մասնակիցներին, հայտարարել է, որ առաջիկա օրերին Ազգային ժողովում նախաձեռնվելու է վարչապետին անվստահություն հայտնելու գործընթաց։