ԳԹԿ. Բուհերում թափուր է ավելի քան 6300 վճարովի և 271 պետպատվերով տեղ

18 հուլիսի 2024 - 17:30 AMT

PanARMENIAN.Net - 2024/2025 ուստարվա ընդունելության միասնական քննությունների արդյունքներով բուհերում թափուր է մնացել ավելի քան 6300 վճարովի և 271 պետական պատվերով տեղ: Այդ մասին ՀՀ կրթության, գիտության, մշակույթի և սպորտի նախարարությունում տեղի ունեցած հանրապետական ընդունող հանձնաժողովի նիստին տեղեկացել է Գնահատման և թեստավորման կենտրոնի տնօրեն Արմեն Փաշայանը։

Ընդհանուր տվյալներին ծանոթանալով՝ նախարար Ժաննա Անդրեասյանը նշել է, որ թափուր մնացած տեղերի պատկերը մտահոգիչ է:

«Անընդունելի է, որ տարիներ շարունակ արձանագրվում է թափուր տեղերի մեծ քանակ: Դա նշանակում է՝ տեղերի պլանավորումը և բաշխումը ի սկզբանե ճիշտ չեն արվում: Կարծում եմ՝ պետությունն այս առումով պետք է տեղերի պլանավորման մոտեցումները փոխի: Բուհերը, աշխատելով Բարձրագույն կրթության և գիտության կոմիտեի հետ, պետք տեղերի նպատակային և իրատեսական պլանավորում կատարեն՝ հատկապես վճարովի տեղերի ճիշտ բաշխման մասով»,- ասել է նախարարը, հայտնում է ԿԳՄՍ նախարարությունը։

Ընդունող հանձնաժողովի նիստում քննարկվել է նաև թափուր տեղերի մրցույթի կազմակերպման հարցը: ԳԹԿ տնօրենի տեղեկացմամբ՝ 444 դիմորդ չի հայտագրել բուհը և մասնագիտությունը, հետևաբար նրանք մրցույթին չեն մասնակցել. ըստ կարգի՝ երկրորդ փուլի հայտագրման ժամանակ դիմորդը պետք է նշեր բուհը և մասնագիտությունը:

Թափուր տեղերի մրցույթին կարող են մասնակցել դրական միավորներ ունեցող դիմորդները: Մրցույթի անցկացման մասին պաշտոնական հայտարությունը նախատեսվում է հրապարակել սահմանված ժամկետներում:

Նիստին քննարկվել են նաև ազգային փոքրամասնություններին տրվող արտոնյալ նպատակային տեղերի բաշխման, ինչպես նաև արվեստի, ֆիզիկական կուլտուրայի ու սպորտի ոլորտներում բուհերին հատկացված տեղերի վերաբաշխման հարցերը:

Այս տարի դիմորդները հնարավորություն են ունեցել ընդունելության միասնական քննություններ հանձնել 2 անգամ՝ համաձայն ՀՀ կառավարության 597-Ն որոշմամբ սահմանված կարգի: Ըստ այդմ` միասնական քննությունների առաջին փուլը կազմակերպվել է հունվարին, իսկ երկրորդ փուլի քննություններն անցկացվել են հունիս, հուլիս ամիսներին: